ZORO-in rang taka che turin India sawrkar ngen

ZORO-in rang taka che
turin India sawrkar ngen
Zo Reunification Organisation (ZORO) chuan Manipur-a Zofate leh hnam lian zawk kara buaina chhuak chu pawi a tiin, he thil thlen dan ngaihtuah chianin pawi a ti lehzual tih a sawi a. Dinhmun him loa awm Zofate sahimna ngaihtuah a, a rang thei ang bera a tih tur ti turin India sawrkar a ngen.
ZORO Gen. Hqrs. thuchhuak chuan, Manipur-a awm Zofate chu engemaw lai atang khan tawngkam mawi vak lo leh dengkhawng taka beih leh vau an ni thin a, hemi chungchangah hian state politician pawimawhte pawh an langsar hle tih a sawi. Zofate zinga Kuki-te phei chu poppy chingtu, ruihhlo tawlhtu, dan loa Burma atanga pemlut tite in social media-a sawi an ni, tiin, ‘Ram hruaitute ber hetiangin an pawr tlat a, chutih laiin Zofate zingah tawngkam dengkhawng deuh hmang an awmin man an ni nghal zel a, Meitei lamin chutianga an tih erawh chuan sawrkarin engtin mah tih a ni ngai lo,’ a ti.
Manipur Zofaten politics-a dinhmun mumal zawk an beiseiin ngaihsak an ni lo a, chutih laiin dan leh hrai kaihlek leh palzutin Zofate ram chhuhsak an ni a, biak in te tihchhiatsak niin an khua atangte in hnawhchhuah an ni tih ZORO hian sawiin, ‘Hei vang hian anmahni hmakhua ngaihtuahin an tangho a, peaceful solidarity rally an nei a ni a. Mahse, khin taktea khin an ni ta a, state pum buaiin an buai ta a ni,’ a ti.
He thil hian Zofate leh Meitei tana chenho reng a har zia leh inrelbawlna hran a tul zia a lang chiang tih a sawi a. Manipur-a hnam tlem zawk, a bikin Zofate politics-a an dinhmun ngaihtuah a, an tana him tur inrelbawlna ngaihtuah thuai turin ZORO chuan India sawrkar a phut tih a sawi a ni.