ZORO-in Zofate thlavang hauh
Manipur buaina avanga Zofate thlavang hauhna, tawrhpuina leh sunna chu ZO Reunification Organisation (ZORO) bultumin Nilaini khan Aizawlah neih a ni a. He thila bultumtu bera puh Manipur chief minister N Biren Singh, tun thlenga ngawih la chuh Prime minister Narendra Modi leh rawva taka David Thiek Hmar chunga chea puh Meitei pa lim hal a ni.ZORO hruaitute chuan Manipur-a Zohnahthlakten hnam anga nuai chimih tuma beih an nih mekna lak atanga talchhuak tura an beihna leh Manipur sawrkar atanga inrelbawlna hran India sawrkara an phut mek chu an thlawp tih sawiin, India sawrkar chu Manipur-a Zohnahthlak awmte rorelna hran pe turin an phut tih an sawi a. Zofa khawvel hmun hrang hranga awmte rorelna pakhat hnuaia insuihkhawm a, lungrual taka kan awm theihna’n ZORO chuan hma a la zel dawn tih an sawi.
Manipur buaina chungchangah Mizoram sawrkar chuan a tih tur hrang hrang bakah an hriat loh thlenga tha a thawh avangin ZORO chuan lawmawm an tih thu sawiin, zirlai pawl leh pawl dangten nasa taka tha an thawh thu an sawi a. Mizorama milar kan neih hrang hrangte chu social media kaltlanga hma la ve turin an ngen tih an sawi.
ZORO chu khawvel hmun hrang hranga Zofate insuihkhawm leh lungrual taka kan chenho theihna tura hma latu a nih thu an sawi a. Zofa hnam zingah thliarbik an neih loh thu an sawi. Manipur buaina chu Kristian-te leh Hindu-te inbeihna a ni tiin, Manipura Zohnahthlak nunna chan hreh lo an khua venghim tura awmte chu an chhuang hle tih an sawi bawk.
ZORO president R Sangkawia chuan Meitei-te chu AD 33 velah Manipur phai an thleng a, Manipura Zohnahthlak kan pi leh pute pawh chumi rual chiah chuan Manipur tlangram thleng ve in, an chengho tih a sawi. BJP sawrkar hnuah Meiteiten phai ram an awmna duh tawk loin tlangrama kan pi leh pute luah ram an chuhpui tih sawiin, Manipura cheng Zohnahthlakte leh Meitei-te chu India sawrkarin rorelna hran ve ve pe se tih chu an duh ber a ni tih a sawi a ni.
Nilaini vek khan Kolasib ah pawh ZORO Kolasib Division huaihawtin Manipur tualchhung buaina avanga Zohnahthlakte tawrhpuina leh thlavang hauhna buatsaih a ni.