Zosap missionary Pi Zawni a chawl

Zosap missionary zing ami Margareth Jones (106) chu 2024 July 24 zing dar 6.30 khan a chenna in, Aberystwyth Wales-ah a thi
Mizoten ‘Pi Zawni’ tia kan koh Margareth Jones hi China-a missionary kal tura a inbuatsaih lai mekin, Zosap missionary Rev. Basil Edward Jones (Pu Zawna) nen intawngin a pasal Mizorama a rawn chhuah hnu kum thumna, 1945-ah a rawn chhuak ve a; Mizorama a awm chhungin zirna lama hmasawnna turin tha a thawh hlawk hlei. Kum 1953 khan Wales-ah an chhungin an kir leh a ni.
Mizorama an awm chhungin fa pathum – Zoduha (Gareth Ewart Jones), Zochhuana (Peter Hugh), Lalpari (Elaine Margareth Jones) te an nei a; Wales-a an haw hnu ah fa dang pathum an nei leh a ni. Pu Zawna hi 2002 December 31 khan thin cancer vangin a thi a; Pi Zawni nen hian an fa paruk bakah an tute an kalsan a ni.
Synod Puipate leh Synod office-a thawktute chuan July 26 (Zirtawpni) khan JM Lloyd Hall, Synod office-ah Pi Zawni sunna hun an hmang a. Synod moderator Rev R Vanlalnghaka’n kaihruaiin, Synod secretary Rev PB Mankima’n Pi Zawni chanchin a sawi a. Synod statistician Rev H Laltlanthanga’n tawngtaisakna hun a hmang a ni.