ZPM chu kan danglam ngam tur a ni – Dr Vanlalthlana

ZPM chu an danglam ngam tur a ni a, an danglam dawn avangin pawhin miin an lakah beiseina an neih phah tih MLA Dr Vanlalthlana chuan a sawi.
Zirtawpnia Aizawl North II ZPM Block conference a hmanpuinaah Aizawl North II bialtu MLA Dr Vanlalthlana chuan ZPM-in sum leh pai hmachhuan tur an nei ve loa, taimak, thawhrim leh intodelh hmangin ram khaichhuah an tum tih a sawi a. Sem policy-in kan ram a tichhia a, ram ei leh bar chu sawi loh kan rilru thlengin nghawng tha lo tak a nei tih a sawi.
“Mipui hian chakna kan nei a, chu chu kan vote a ni. He kan thiltihtheihna hi kan hriat a ngai a, huaisen taka kan hman a ngai. ZPM hi danglam ngam kan ni tur a ni a, kan danglam dawn avangin mi pawhin beiseina kan lakah an neihsan phah. Party dang atang leh neutral mai bakah thalai atangin thlawpna kan dawng nasa hle a ni,” a ti.
ZPM chuan BJP an thawpui dawn lo tih MLA hian a sawi a. Tunhnaiah BJP nena thawkho tur leh thurualpui tur anga sawi tum tlat an awm, tiin, sim vang vang turin a chah tih a sawi a ni.
Hmanpuitu dang AMC Ward No.III corporator C Lalchhandami chuan state dangten hma an sawn chak chhan chu a ngaihna hria ram hruaitu an neih vang a ni, tiin, “Kan state hi kan thlen chin chu heti mai hi a ni. Kan ram hruai mek leh lo hruai tawh ten an theihtawpin hna an thawk a, thil tam tak pawh min hnutchhiah. Mahse, hei hian thalaite tuihalna a chhawk zo loa, kan chhehvel ramte hmasawnna an hmuhin kan ram tana tih theih ve tho a ni tih an hria a. Kan thalaite rualawhna hi a taka thlentir turin ZPM chuan policy mumal tak kan nei a ni,” a ti.