ZPM Coordination Committee sawi zui

Ningani hnua titi lar pakhat chu ZPM Coordination Committee chungchang a ni awm e. CSS hnuaia thawkte chungchang an rel avangin titi luah awm tak pawh an ni a, sorkar rel tura ngaih an lo rel avangin titi an luah bawk.
All Mizoram CSS Employees Coordination Committee huaihawtin CSS hnuaia mite an nuar mek a, dah ngheh phutin sit-in-demonstration an nei mek. CSS hnuaia mite chungchang hi Ningani khan ZPM Coordination Committee-in an lo rel a ni.
All Mizoram CSS Employees Coordination Committee hruaitute chuan ZPM Coordination Committee-in an chungchang an lo ngaihtuah hi mak an tih thu leh a awmzia an hriat loh thu an sawi.
“Party-in khatianga kan chungchang an lo ngaihtuah ve kha mak kan ti a, a awmzia kan hre lo a, lungawina turah pawh kan ngai lo,” an hruaitu pakhat chuan a ti.
Coordination Committee-in khatianga an rel avanga lungawi rikngawt an tum loh thu leh, party thuhnuaia awm an nih loh avangin party thurel avanga lungawi chu an tih tur a nih loh thu an sawi a, “Kan chungchang hi sorkarin a ngaihtuah tur a ni, party ni lovin,” an hruaitute chuan an ti.
A tukah home minister-in All Mizoram CSS Employees Coordination Committee te hi a kawm a, chutiang chu thil nih dan turah an ngaih thu an sawi.
ZPM Coordination Committee-ah hian chairman chu chief minister a ni a, minister zawng zawng an tel. General secretary pakhat leh secretary general an tel a, adviser pakhat leh PAC member pakhat an tel bawk.
A hmain ZPM Coordination Committee hi vawi khat an lo thu tawh a, chuta an thurel pakhat chu tuna Aizawl khawpui chhunga lirthei tlan dan hi a ni.