ZPM-in BJP nena sawrkar intawm siam a ngam ta lo – BJP president
Mizoramah BJP telna sawrkar a pian chuan state budget atana centre BJP sawrkarin cheng vaibelchhe 40000 pek a tiam chu ZPM chuan BJP nen sawrkar intawm siam a ngam loa, kan chan ta rih tih BJP Mizoram president Vanlalhmuaka chuan a sawi.
Autunomous District Council huamchhunga MP inthlan campaign-a a kalnaah Vanlalhmuaka chuan, central hotuten state budget cheng vaibelchhe sing 4 bawr kum 2023 khan BJP telna sawrkarna a pian chuan pek min tiam a. Ni mah se, tuna sawrkar mek ZPM hian BJP nena sawrkar intawm a ngam ta loa, chuvangin kan ram hmasawnna tur sum tam tak kan chan phah ta rih a. ZPM MLA leh minister-te Delhi kal pawh hlawhtlingloin kutruakin an haw thin niin a sawi.
Central BJP sawrkarin Mizoram pum kawng siamna a dahsak a. Kawng laih nan cheng vaibelchhe 50000 min pe a, vbch. 8000 kan hmang zo tawh tih BJP Mizoram hruaitu hian sawiin, “Heng sum hi Mizoram CM sawi chhuah a ni loa, mipui bumna hmanrua atana mahni tuh loh rah sawi hi a tha lo. Tu pawh sawrkar se, central hian kawngpui siamna hi min pe dawn tho tho,” a ti.
MNF candidate chuan NDA zawm a, a chhung atanga BJP beih an tum thu a sawi tih sawichhawngin, “Mizorama MP pakhatin a chhung atangin ka bei ang, a tih hi chu, mi a nileng lo chuan a mawl thlak zia an hrethiam ngei ang. MP 500 chuang neihna ram India rama MP pakhat neiin a chhung atanga beih a tum thu a sawi hi Central BJP hian an kuta tho fu ai pawhin an ngaipawimawh lo zawk ang,” a ti.
ZPM-in kalphung thar an tih chu kalpui a nih theih nan state-a ruling party MP candidate thlang loin central-a sawrkar lai leh sawrkar leh tur BJP MP candidate vote a tul tih Vanlalhmuaka hian a sawi a. Thlantlin a nih chuan kalphung thar dik tak zawk chu kan hmu thei tawh dawn tih a sawi a ni.
“North East-ah State president candidate awmchhun ka ni a, thlantlin ka nih chuan State president tling awmchhun ka ni dawn. Central minister nihna chance tha tak ka neih bakah Kristian pa ka nih bawk avangin Union minister nihna chanvo min pe ngei dawn a ni,” a ti.