ZPM-in eiruk chingte a vulh lian – Congress

ZPM-in eiruk chingte a vulh lian
– Congress
Eiruk thubuai avanga court-in thiam loh a chantir chu ZPM-in Lai Autonomous District Council chief executive member atan a ruat tih Congress party chuan sawiin, mipui zahlohna leh eiruk chingte vulhlennaah a ngai a, ZPM chu Pathian ram tungding theiah a ngai lo tih a sawi.
MPCC thuchhuak chuan, tunhnaiah Special Judge (Prevenvention of Corruption Act) in eiruk thubuaia thiamloh a chantir, V Zirsanga chu kum 4 jail tang tur leh cheng nuai 4 chawi tura a hremnaah, High Court-a a khinlet avangin bail-a chhuah lailawk a ni a. Hetianga eiruk thubuai lian tak nei mek hian politics khel chhunzawm tawh lo se, tih chu Congress party duhdan a n ai. ZPM Thalai pawhin 2024 February 7 khan hetiang mi, eirukna laka fihlim loin LADC kaltlanga ram rorelna hmun pawimawh a chelh chu pawi an tih thu leh ram rawngbawlna chelh chhunzawm zel tlaka an ngaih loh thu, thuchhuah an lo siam khum tawh tih a sawi.
Hetih lai hian Mizoram sawrkar chuan LADC CEM atana V Zirsanga a ruat chu mipui zahlohna lian tak leh eiruk chingte vulh lennaah an ngai tih sawiin, ‘ZPM hian Pathian ram tungding turin hma kan la dawn, tiin MLA inthlan hmain mipuiah an inzuar a, a thu chu mawi viau mah se, an chet dan phung hian Pathian ram tundin lam a hawi mawlh lo tih hi Congress party ngaihdan a ni,’ a ti.
Tun thlenga ZPM Val Upa Council-in hemi chungchanga thu a la nei lo leh a ruattu pawh an la kamkhat lo chu mak a tih thu Congress thuchhuah hian sawiin, ‘CM, minister, MLA emaw corruption-a inhnamhnawih chu ban theihna an nei ang, an tih kha an power an hlihsak ta em ni, tih hi kan zawt a ni,’ a ti.
ZPM sawrkar chu an awm dan tur anga an insawi angin an awm lo tih sawiin, an tih tum an sawi ang ni lo zela awm party, sawrkar atana kan hrawn chu vanduaithlak a ti tih a sawi a ni.