ZPM-in mipuiah sum tuak

ZPM-in mipuiah sum tuak
Corruption do ngam tur sawrkar tha an din theihna atan mipui atangin candidate-te tan sum an tuak tih ZPM party chuan an sawi.
April 24 zan khan ZPM Fund Raising Committee bultumin ZPM Fund Raising Campaign khuhhawn a ni a. An party working president K Sapdanga chuan ZPM Campaign Committee chuan Zoram hmun hrang hranga mipui inhawnna, India ram leh ram danga Zohnahthlak awmte thlenga inhuamna a hria a, party unit leh block hrang hrangten sum tuaka an hnatlangte a hmuhin, hun remchang – Campaign Fund thawh theihna siam thain a hria a, he programme hi an buatsaih ta tih a sawi.
“Mipui, a bikin thangtharten kan beisei sawrkar tha leh rintlak, corruption do ngam tur, mipui hmai eng zah nachang hria sawrkar kan neih theihna’n, kan remchan ang zat apiang thawh a, mipui sawrkar min tuak chhuahpui turin mitin kan sawm a. ZPM party hi mawhphur tura min siam phawt chuan sawrkar tha, sawrkar thianghlim mipui sawrkar pek let ngei kan tiam nghal a ni,” a ti.
Kumin kumtawpa MLA inthlanpui neih turah party thenkhat chuan sum hman tur an neih ngah zia mipui hriatah an puang a, ZPM chu sum hman tur nei ve lo leh inthlan dawna puk tur dapa buai viau tur angin an rum thaih tih K Sapdanga hian a sawi.
“Kan khingpui party-te chuan an party candidate-te puihna’n bial khatah cheng nuai za tam an dahtha tawh tih thawmte kan hria. ZPM chuan kan candidate-te hnenah sum pai tur kan nei ve si loa, hmuntina kan unit te hnenah an biala ding candidate-te chu tlemte tal sum pai ve turin kan ngen a. Unit thenkhatin huan samin, thenkhatin rawra chhuin, an candidate-te puihna tur sum an tuak a. Chu’ng mite chu kan chhuang a, kan ramah politics khelh dan kalphung thar a piang mek tih lantirnaah kan ngai,” a ti. Huan sam a, rawra chhua an tuak chhuah an MLA-te chuan mipui an rawk duh an rin loh bakah ram hmasawnna hna thawhna atana sum lutte pawh an lo hlep ruk duh an ring loa, chu MLA tuak dan kalphung thar chu ZPM-in hlawhtlinpui an tum, tiin a sawi a ni.
Suk tuak khuhhawn zan hian mi inphalte thawhkhawm Rs 9,35,077 an hmu a ni.