ZPM-in MNF sawrkar thiltih a rochun tam – MNF adviser

ZPM sawrkar chuan sawrkar hmasa thil tih mek lai leh sawi pawp hnu tam tak a rochun chho mek tih MNF adviser H Rammawi chuan a sawi.
Zirtawpnia MNF office Mizo Hnam Runa inkhawmah State Planning Board vice chairman hlui ni bawk H Rammawi chuan, SEDP cheng vaibelchhe 300 budget-a dah tawh, MNF sawrkarin a sem hman loh chhan chu, nikum hmasa khan Planning-in bugdet-ah a allocate a, village level leh district level-ah a thangrei em em a, a dawngtu chhungkuaah a dawngtu tur boral leh nupa inthen avanga siamrem tur tam tak a awm bawk nen, September 2023 khan 1st & 2nd phase 2nd instalment hnawhluh an tum a, a vawihnihna tur an tih mek laiin MLA inthlan puan a ni ta tih a sawi.
“Ongoing a nih vangin sem chhunzawm tur a ni a, cheng vbch. 150 dawngtu tur kan thlang hman a, Planning-ah expenditure sanction kan dil hman loa, chu chu ZPM sawrkarin tuna a rochun tak hi a ni,” a ti.
Healthcare chu MNF sawrkar tihchhuah a ni tih H Rammawi hian a sawi bawk. Budget atanga tih zel dawn chuan a hautak a, India ram state tam takin an tih theih loh a nih avangin, MNF sawrkar laia CM-in tih ngei tha a ti bawk nen, Asian Develpoment Bank-ah an ngen a, Union Finance minister-in a thawn sak a, clearance pek an nih hnuah bank lam procedure angin kal a ngai leh a, agreement an ziah tawh hnuah cheng vbch. 1000 an nei dawn tihna a ni, tiin, ZPM ministry an vannei dawn hle tih a sawi a ni.
Niti Ayog-in Finance ministry-a a thawnsak hnuah pawh ADB hmin leh an ngai a, tih tur an tihfel hnuin ADB ah feasibility leh DPR siam a ngai a, chumi siam turin e-tender an chhuah a, a siam man zawng zawng pawh ADB tum tur a ni a, UD&PA department-in tender a chhuah a, survey an tih ngar ngar hnuah an zo tep tihin inthlanin a nangching ta tih a sawi a ni.
Aizawl khawpuia cable car tlan tirna turin central-in visibility a pe a, Aizawl Sustainable Advance Transport Project tiin tunah he hna hi a kal mek a. UD&PA-in e-tender a ko hman tihin sawrkar a inthlak tih MNF adviser hian a sawi.
“MNF sawrkar khan thil tha duhin nasa takin hma a la a, he project hi tun sawrkar hian an chhunzawm duh angem? Thangthar zelte hmakhua ngaiin chhunzawm se ka duh. US dollar maktaduai 250 puk phalna kan nei vek tawh a. Tun sawrkar pawh hian bawhzui ve se a duhawm hle,” a ti. MNF sawrkarin ram leh hnam, thangtharte tan rochun tur thil tam tak a ngaihtuahin a takin a thawk tih a sawi a ni.