ZPM-in MP candidate puang

2024 Lok Sabha MP thlan turah sawrkar lai party, Zoram Peoples’ Movement chuan an candidate atan Richard Vanlalhmangaiha, Venghlui Aizawl an ruat.
Thawhtanni khan an party office-ah ZPM president Lalliansawta’n MP candidate hi a puang a. Mizoram mipuiin lungrual taka vote theuh tur leh ZPM party-a Block leh Unit hruaituten thahnemngai taka thawhpui turin a sawm.
MP candidate tur Richard Vanlalhmangaiha chuan candidate-a an dah chu a tan chona lian tak a nih rualin MP nih chu a hmathlir ruk ve fo a ni thin tih sawiin, “Ka huphurh rualin, chief minister Pu Lalduhoma kaihhruaina hnuaia kalphung thar mipui sawrkarah min beiseina ang hlenchhuah ngei ka tum dawn a. Chumi ka tihhlawhtlin theihna tur chuan vote hlu tak min pe turin mipui khawngaihna ka dil a ni,” a ti.
ZPM-in MP candidate atana a ruat Richard Vanlalhmangaiha hi kum 1978 khan Gorakhpur, Uttar Pradesh-ah Lalzawma (Wing Commander retired) leh Zorengpuii (L) inkarah a piang a, a pu Dr Rosiama (L) hi Mizo District Council-a chairman hmasa ber niin, a pi L Thanmawii (L) pawh Mizo hmeichhe zinga MLA-a thlantlin hmasa ber a ni. A nupui C Lalhmingmawii niin, tunah hian Venghlui Aizawlah an chhungkuain an khawsa mek.