ZPM leh INC-a leng lote kan sawm – MNF

MNF party chuan party danga leng lote chu an party-ah an lut mek zel a, la lut lo te pawh lut turin an sawm tih an sawi.
MNF Media & Publicity Department hruaitute chuan ZPM leh Congress bakah party tenau dang leh neutral atangin nitin MNF zawm thar an neih belh reng a. Zoram mipuiin Pu Zoramthanga kaihruai MNF chu an sawrkar leh ngei an ring tih an sawi.
ZPM chu an hotute ah inrem lohna leh ngaihdan inanlohna a nasa hle tih sawiin, an hotuten duhsak hrang theuh an neih avangin an duhsak zawng theuh haivur na’n an party danpui (constitution) chu anmahni ngeiin an bawhchhia tih an sawi a. Mahni party chhung pawh rel fel thei lo leh mahni dan siam pawh bawhchhe duh hian rorelna fel an kalpui loang tih a chiang hle, an ti.
Congress hruaitu lian tak tak Congress party-a la awm hram hramte chu MLA ticket chang lo tur chiangsa an nih thu sawiin, inthlan huna an president Pu Lalsawta paih theih a nih beiseia a der maia la Congress hram hram an nih thu an sawi a. Congress leh an hruaitu tharah mipuiin beisei a nei tawh lo tih an sawi bawk.
MNF party chuan Congress, ZPM leh party danga beidawngte leh neutral-te, hnam rilru pute fuamkhawmna, hruaitu tha leh rintlak awmna nationalist party-a haw khawm zel turin an sawm tih an sawi a. An dik tawk lohna leh tlin tawk lohna theuhte insiamtha chung zela Pathian leh ram tana rawngbawl puiah an sawm tih an sawi a ni.