ZPM leh MNF-in Aizawl khawpui enkawl dan tur ngaihtuah hman lo – MPCC president

ZPM leh MNF-in Aizawl khawpui
enkawl dan tur ngaihtuah hman lo
– MPCC president
ZPM leh MNF chuan Aizawl khawpui enkawl dan tur ngaihtuah hman lo lekin thildang min buaipui san tih Congress hruaitu Lal Thanzara chuan a sawi.
Mizoram Pradesh Congress Committee (MPCC) chuan Zirtawpni khan Aizawlah mipui chhanchhuahna leh AMC inthlan campaign kharna punkhawm an huaihawt a. MPCC president Lal Thanzara chuan, mipui thlavang hauh tura kalkhawm an nih laiin, ZPM sawrkar hnuaiah mipui chang ni lo, Aizawl khawpui boruak tinuamtu thingkung lehzel thlavang hauh a ngai ta tih a sawi. Sawrkar enchhin mek leh MNF chuan Aizawl khawpui enkawl dan tur ngaihtuah leh, mipui thlavang hauh turin hma an la dawn emaw tih laiin, Bawngkawn Brigade Field-ah SASCI football tournament min khelhsan avangin Aizawl khawpui chhan turin Congress party an rawn penchhuak tih a sawi a ni.
Tun dinhmunah MLA leh corporator tih tham nei lo mah se, Pathian lam ena Pathian malsawm tlaka awm tura Congress mipui sawmin, Congress party candidate-te vote theuh turin mipui a sawm tih a sawi bawk.
AMC corporator kalchhuak ta Rosiamngheta chuan, Aizawl khawpui laili atanga Assam Rifles an chhuah theihna tura hma la hmasatu, an awmna tur lo buatsaih hmasatu hrechang loin, party pahnih – MNF leh ZPM chuan umchhuaktu nih an inchuh a. Lengpui Airport ram hralh chungchangah erawh a hralhtu nih an inhnawn leh si niin a sawi.
“Budget thiam inti ZPM-in budget vawi thum an pharh tawh a, kan ram dinhmun a la ngai reng si. AMC rorelna lamah MNF an hlawhchham a, pawisa a awma phur hle siin, pawisa a awm loh erawh chuan an zawi hle a, sawrkar pawh an chak tawh lo. Aizawlah ran vulh khapna – ‘Total Prohibition on Vawk Vulh’ lo pian chhan chu ZPM corporator-te vang a ni,” a ti.
AMC sawrkar chu inzirna tur ni a ni lo tih sawiin, AMC inthlan turah hian Aizawl mamawh thawk thiam tur thlan a ngai tih a sawi a. Congress party-in sawrkarna a siam a nih phawt chuan in sak chungchanga harsatna tam lutuk an titlem dawn tih a sawi.
MPCC general secretary PC Laltlansanga pawhin, Lengpui ram IAF hnena hralh a nih bakah Lengpui Airport ngei pawh hralh chakin IAF hnenah an zuar titih hial nia sawiin, “ZPM sawrkar hian MNF sawrkarin Kolkata-a Mizoram House a lo hralh tawh, pawisa inhlan vek hnu ah a cancel leh theih chuan, Lengpui ram IAF hnena hralh hi a diklo tih a hriat chuan a titawp thei ngei tur a ni a. Mahse, hralh a nih theihna tur hian rang takin an bawhzui a, ni 100 chhungin pawisa an inhlan fel vek hman,” a ti.
Lengpui ram hralh ang bawk hian Sihphir-ah pawh IAF-in ram an lei a, hei hi chu a ram neitu dik takte account-ah pawisa a luh avangin tumahin an sawi zui lo tih sawiin, Lengpui ram hralhah erawh feet khat chu sawi loh, inches khat pawh ram nei ve miah lo Henry Hlawnmual-in cheng vaibelchhe 117.90 a fanghmanoei hmiah mai tih a sawi. “He pawisa hi ama ta vek tur ni loin, central leh state sawrkarah pek tur a ngah thu Henry Hlawnmual hian a sawi a, ama ta tur ni loa a sawi hi thamna sum a ni,” PC Laltlansanga hian a ti a. Lengpui ram hralhna tuihang lo hawptu tan chuan Congress party chu an hlauhawm dawn tih a sawi a ni.