ZPM punkhawmnaah zu leh sa nena chet vak a rem ve lo – Lalduhoma

ZPM punkhawmnaah zu leh sa nena chet vak a rem ve lo – Lalduhoma
Kalphung thar an inzirtir mek laiin, zu leh sa nena ZPM puipunnaa chet vak vak chu a rem ve lo tih ZPM leader Lalduhoma chuan a sawi.
Zirtawpnia ZPM Champhai North Block Party Meet a hmanpuinaah Lalduhoma chuan ZPM chu an danglam tur a ni a, puipunnaah midangte kalkhawm anga zu nena tih luih luih a rem ve lo, tia sawiin, “Zu in mi pawhin a hun leh a hmun an hre ve tur a ni. Kalphung thar kan inzirtir mek lai a, zu leh sa nena puipunnaa rawn chet vak vak hi a rem ve lo, ZPM chu kan felfai tur a ni,” a ti.
Sawrkar leiba tam tak inchhekkhawl chho mek an zirchianin, sawrkar lai mek leiba chauh niloin, sawrkar hmasa atanga lo inchhekkhawl chho zel a ni reng tih an hmuchhuak niin a sawi. “Kan leibat hi a cheng zata sawi tur a ni loa, GSDP atangin za zelah engzat nge, tia chhut zawk tur a ni a, RBI-in a chhut dan hi rin mai tur a ni. Chhiarkawp dik lo zawnga mipui hrilhfiaha bum tum hi thil dik a ni lo. Bill tang mek leh damlote tan ZPM sawrkar hun a nghahhlelh awm a, ZPM a sawrkar chuan inrenchem kan inzirtir dawn,” a ti.
ZPM a sawrkar chuan tar pension chu Rs.1000 in an tipung dawn niin Lalduhoma hian a sawi a. Champhai boarder trade hmalakna muang lutuk chu a veiawm hle tih sawiin, ZPM chuan hmalak dan tur an ruahman tawh niin a sawi.