ZPM Research Wing leh VUC-in FCAA 2023 zirchiang turin chah
ZPM Research Wing leh VUC-in
FCAA 2023 zirchiang turin chah
Forest Conservation Amendment Act 2023 chu ZPM Research Wing leh Val Upa Council-in zirchiang tha leh deuh tura thu a rawn thu MNF hruaitu Prof. F Lalnunmawia chuan a sawi.
Thawhtannia Mizo Hnam Run-a inkhawmah MNF general secretary Prof F Lalnunmawia hian FCAA 2023 chungchangah sawrkar lam leh anmahni tantuten a hlauhawm loh dan leh Article 371(G) hmanga dodal theih a nih loh thu an sawi laiin, Mizoram ang thoa inhumhalhna dan – Article 371A nei Nagaland State Assembly chuan a dodal thung tih a sawi.
FCAA 2023 chu kan environment leh Zofate hmalam hun hriltu pawimawh tak a nih theih avangin thalaite leh zirlaite pawhin an ngaihven a tul hle tih a sawi a. FCAA 2023 hmang hian kan ram leh ramngaw chu hun reilote chhungin tichereu vek kher lo mah se, hun lokal zel turah project pawimawh (national importance) changchawiin zawi zawiin sawrkar laipuiin defence installation leh mineral resources haichhuahna lamah awlsam zawka hma a lak theihna kawng a rawn hawng tih a sawi a ni.
“Mizoram hian hma sawn zel se kan ti theuh a, thalaite pawhin hmasawn chu an thlahlel. Chutih rual chuan, development project – kawngpui sial leh leihnuai atanga thil laih chhuah hian nasa takin environment-ah nghawng thalo a nei thin. Ramngaw a ti chereu a, tuihna a ti tlem a, leilung, tui leh boruak bawlhhlawh a siam a, nungcha bakah mihring hriselna in a tuar a; ngaw thiah vangin ramsa, sava leh nungchate nunphung a tibuai thin,” a ti.
Hun kaltaah India ram state zingah Jharkhand, Chhatisgarh, Odhisa-a tribal-te an ram chhung ngeia nekchepin an awm fo thin a, heng tribal hnamte hian nasa takin an lo dodal tawh thin tih a sawi.
“Inhumhimna dan nei ve lote pawhin huaisen taka an ram leilung leh ramngaw tihchhiat tur an dodal lai a, keini kan hmanraw neih Article 371(G) hi eng anga tha leh chak nge tih pawh enchhin ngam lo leh tang eih loa kan sawrkarin FCAA 2023 a pawmpui ta mai hi a pawi hle. FCAA 2023 hian kan hma hunah eng angin nge nghawng tha lo a neih theih tih hi ZPM Research Wing leh VUC hian zirchiang leh deuh turin thurawn ka pe duh a ni,” Prof F Lalnunmawia hian a ti.