ZPM sawrkar hnuaiah MYC kaltlang 41-in hna hmu tawh – MYC chairman

ZPM sawrkar hnuaiah MYC
kaltlang 41-in hna hmu tawh
– MYC chairman
ZPM-in sawrkarna a siam atanga hun reilote chhungin thalai thahnem takin Mizoram Youth Commission hmalakna kaltlangin hna an hmuh tawh tih MYC chairman Malsawmzuala Ralte chuan a sawi.
Thawhtannia ZPM party office-a inkhawmah MYC hotu hian kumin chhungin ZPM sawrkarna hnuaiah MYC kaltlangin Mizo thalai 41-in India ram chhung leh pawnah ten hna an hmu ve tawh tih sawiin, “MP inthlan model code of conduct-in min phuar chhung kha rei hle lo se chuan, hei ai hian an tam ngei ang. MYC kaltlanga hnathawh tur hmu zat hi an pun chhoh leh ngei kan beisei,” a ti.
Mizoram Youth Commission hi Act of Legislature hmangin kum 2008-a din a ni a. Kum 16-a upa a ni tawh tih Malsawmzuala Ralte hian sawiin, Mizo thalaiten hna an zawnna kawnga tanpui leh kawng kawhhmuhtu tura din a ni a. Kumin January 22 khan chairman hna a zawm tih a sawi.
“Hnathawh tur awmsa a awm hran loa, thawh tur leh tih tur dap chawpa zawn chawp zel a ngai a. Theihtawp kan chhuah piahlamah min rawn pana thil tih tur remchang rawn awm ta te pawh a awm nual bawk. ZPM sawrkarna hnuaiah MYC chuan thalaite tan kawng sial a, malsawmna ni turin hma a la a ni,” a ti.
Honda company nen thawh dunna thuthlung ziakin, an CSR hmangin sum an rawn thawh a, chu chuan hotel management training MYC office-ah batch 1-na an zo tawh tih MYC chairman hian a sawi. Mizo thalai 26-in training zoin an training lai hian India ram hmun hrang hranga 4 star leh 5 star hotel-ah hna an hmu vek a. Tunah hian batch 2-na class kalpui mekin, Lunglei Youth Centre-ah 20 vel, Aizawlah 20 velin an zir a, nakum January thla laihawl velah an zir zo anga, hna an hmu leh vek turah an ngai tih a sawi a ni.
Mizoram Youth Commission hmalakna:
* MYC office Aizawlah thalai hna zawng tan group A leh B coaching class – zing, chhun leh tlaiah kalpui a ni a. Zirlai 280 vel an nei mek.
* One day workshop on career guidance and counselling an buatsaih a. MCS, MPS, MIS, MF&AS, MSS leh MFS ten hun an hmang a, zirlaiten hlawkthlak an ti hle.
* Staff Selection Commission leh banking-ah coaching class hawn a, thalai a tam thei ang ber an luh theihna turin ruahmanna an siam.
* ASI exam turte pualin mock exam an buatsaih a. Aizawl bakah Lunglei, Siaha, Champhai leh Kolasibah coaching class kalpui a ni. Coaching class atan fee an ti tlawm. Kumtharah a remchan angin, Serchhip leh Mamitah Youth Centre din theih an inbeisei.
* Mizoram University Incubation Centre nen thawk dunin December thla chhung hian Enterpreneurship Development Centre MYC office-ah din turin hma an la a, livelihood business incubator buatsaih an rel bawk.
* India leh Taiwan-in hnathawk tur lakluh kawngah inremna an siam bawhzuiin tunah hian Mizo nula pahnihin August thla atang khan Taiwan-ah Chinese tawng zirin an awm mek.
* Indigo Arlines leh Air India nen thawh dun dan tur an sawiho mek a. Air hostess chu hmeichhe tan chauh a nih avangin mipa dil ve tum an awm nual a, an ni hian ground crew an la leh thei a nih chuan an dil ve thei dawn.
* TATA Trust nen an indawr mek a, an intih fel chuan hotel-a thawk tur front office assistant, house keeping-ah training tur an la anga, Guwahati-ah an training ang.