ZPM sawrkar kutthlakna chin kawngpui a mam tha. – ZPM thupuangtu
ZPM sawrkar kut thlakna chin kawngpui chu a mam nuam hle tih an party thupuangtu chuan a sawi. ZPM thupuangtu K Laltluangkima chuan, ZPM sawrkarin kawngpui tha nei turin an sawrkar tirh phat atangin tan an la a. Chief minister leh PWD minister thawhrimna azarah kawngpui tha kan nei teuh ta tih a sawi.
ZPM sawrkar kawngpui chu a tha bik tur a ni, an tih angin a tha bik reng a. Kalphung thar hmangin mi rama an hman ang khawl – paver chu a theih na naa an hman avangin an kawngpui siam tawh chu a dum zuar satliah loa, a mam tha a, lirthei tan tlan a nuam em em bakah a tlo dawn tih a sawi bawk.
“Mi tam takin, eng vangin nge kan khawpui kawng hi dum zuar si a sawh boh boh, kan ti thin a. Hengte hi kalphung hlui kawng siam a ni. Aizawl khawpui chhungah ngei pawh kawng biboh a la tam mai. ZPM kutthlakna chin chu a mam nuam khawp mai a, kar loah mipuiin ZPM mizia leh an hna a that bik zia an hre telh telh dawn. Chief minister-in a sawi fo angin kan danglam telh telh dawn a, a rei tial tial anga, kan thawk tha telh telh dawn,” a ti.
Hetianga kawng mam tha tak an siam thei mai hi tute emaw in na an lo ti nge, Zuangtui-a hot mix plant chu tu tu emaw fuihpawrhin an hal kang ta niin ZPM thupuangtu hian a sawi.
“Hei hi ZPM chuan pawi kan ti a, kan ui a; Mizote kan lo la hniam hle mai, tih bak sawi theih kan nei lo. A chhan chu, pawikhawihtute kha kan Mizopui tho an nih avangin, pa chan chang takin hrehawm kan tuar tlang anga, awm dan mawi leh tha inzirtir zel ila, khatianga hleilen vakna ang chi leh sawrkar thil tichhe zawnga hmalakna ang chi kha chu ruling an ni emaw opposition an ni emaw tu mahin thlentir tawh lo ila kan duh a ni,” a ti.
Thlai thar pali lei tura thlan zingah tlemin hmunphiah chu buaipui nasa deuh mah se, felfai taka hralh zawh vek a ni tih a sawi a. Sawhthing chu khawvel puma a rate a chhiat avangin an buai hle a, sawrkar chuan kumin June thleng a la lei dawn tih K Laltluangkima hian a sawi.
“Khaw thuawih deuh chuan an vanneihpui deuh a, khaw thuawih lo deuh chuan an tuar deuh. Hun lokal zel turah sawrkarin loneitute a khawngaihin a duhsak zel ang. Loneitute pawhin sawrkar thu ngaihchan thiam a, an thu awih deuh deuh a pawimawh telh telh ang,” a ti.