ZPM sawrkar mei khupin an awm – Tawnluia

ZPM sawrkar mei khupin an awm
– Tawnluia
Zofate thlavang hauh kawngah ZPM sawrkar chu India lakah mei khupin a awm mek tih MNF hruaitu Tawnluia chuan a sawi.
Zirtawpnia an party office-a inkhawmah MNF National Core Committee member Tawnluia chuan, Bawm unau, nunau nena Mizoram rawn lut tawh 28 chu Mizoram sawrkar leh Assam Rifles in tunhnai lawk khan an nawr let a. Kan unaute thlavang hauh inti ve siin, a tak takin engmah an ti ngam loa, meikhupin an awm tiin a sawi.
“Chief minister berinin central thuneihna do ngawt chi a ni lo, a ti a. Sawrkar hmasa leh CM hmasa hmalakna leh tun sawrkarin kan unaute thlavang a hauh dan a inang lo hle. India sawrkar laka unaute thlavang pawh hauh ngam lo sawrkar kan hrawn hi a pawi hle,” a ti.
ZPM sawrkarin sum enkawl a thiam loh vangin financial crisis an hmachhawn mek a, tuna an dinhmun chu BJP minister pek nge zu zawrh, tih a ni deuh maia a lan thu MNF NCC member hian a sawi. “Sum an puk awk awk a, oil man an tisang a, buhfai man nasa takin an tipung a, chhiah an tipung a, khang kha enga tan nge an hman. Sum enkawl danah an hlawhchham chiang hle a ni,” a ti.
MNF chu Mizo hnam hmahruaitu atana Pu Laldenga te kaltlanga Pathianin a din, ram zalenna atan nunna hlantu martar-te nena thu an ni tih Tawnluia hian a sawi a. Martar-te leh pasalthate avangin MNF mai niloin Mizo hnamin zahawmna nasa tak a lo khum tawh thin tih a sawi. “Pu Laldenga hoin Mizo nationalism kha chawh nunin awm lo se, kan hnam hi chimralin kan awm tawh hial maithei. Kha’ng lai khan Vai sumdawng an tam em em tawh a, Vai sari mawi kan ti tan a, Vai film pawh hmuhnawm kan ti hle tawh. Hnam leh sakhaw humhalh duhna lo piang ta avangin thangtharte luah tlak Zoram kan la nei hi a lawmawm takzet a ni,” a ti.