ZPM sawrkar sum puk vbch. 18911 Leiba tihniam thuai turin kan phut – Congress party

ZPM sawrkar sum puk vbch. 18911
Leiba tihniam thuai turin kan phut
– Congress party
ZPM sawrkarin kum thum chhunga sum a puk tawh chu cheng vaibelchhe 18911.51 a tling tawh tih Congress party chuan an sawi a. Sawrkar leiba tihniam thuai tur leh ram sum dinhmun siamtha thuai turin an phut tih an sawi.
MPCC Publicity Board chairman PC Laltlansanga chuan, ZPM party chuan mipui vote zawnga an campaign laiin, sawrkar kal tawhte nasa taka sum puk thin leh leibatna thanga Mizoram mipui awktu ang hialin an puh a; sawrkarna a siam hunah chuan sawrkar leiba titlem a, sawrkar sum puk thin pawh tih bo hial tum angin an inzuar a, a finfiahna video pawh hmuh theih a la awm tih a sawi.
Hetihlai hian sawrkar kum kal meka state budget chu cheng vaibelchhe 17076.92 a ni a, state leiba chu vbch. 19085.15 vel a ni tih sawiin, “Sawrkar awm tawh zawng zawngah ZPM sawrkar hi sum enkawl thiam lo ber a ni. Bat an huai em em a, kan tu leh fate rulh turin sum tam tak an puk reng a. Kum 2026- 2027 kal mek (April to October) chhung ringawt hian vbch. 6119.84 an puk leh tawh a. Hei hi kum 2025- 2026 a sum puk vbch. 5308 aiin a tam tawh zawk,” a ti.
ZPM-in thalaite hnena an tiam ‘CM Special Package’ chu a dawngtu ni turin ZPM Legislature meeting chuan ZPM nih a ngai, tia an pass thu ZPM MLA ngeiin a sawi a, video evidence pawh a awm tih MPCC Publicity Board chairman hian a sawi a. Huapzo sawrkar, tih bik awmlo sawrkar, mahni party leh chhungkhat duhsak bik lo tura Bible nem meuha thu tiama chhechham party sawrkar an ni tih theihnghilh thak khawpin ZPM sawrkar chu a kal mek tih a sawi a ni.
Hun reilote sawrkarna an chan atangin Mizoram sawrkar leiba a pung nasa hle tih sawiin, “Kum 2026- 2027 state budget vbch. 17076.92 a nih laiin, Mizoram sawrkar leiba neih mek chu vbch. 19085.15 a ni. Kan state budget aia state leiba tam zawkna hi vbch. 2008.23 a ni. Hetiang em ema kan ram sum dinhmun a chhiat hi a la awm ngai loa, ZPM sawrkar hi leiba thangah a awk mek,” a ti.
Sawrkar leiba tihniam thuai tur leh kan ram sum dinhmun siamtha thuai turin ZPM sawrkar an phut tih PC Laltlansanga hian a sawi a. Sum puk chawp hmanga duhsak zawng leh thil titheite sum siamna atana restricted tender leh departmental works hmanga contract hna pek vak vak bansan a, sum puk tur dap kual reng chunga inchhek arbawm bansan turin an chah tih a sawi a ni.
MPCC Publicity Board chairman sawi danin:
# Kum 2008 atanga Mizoram sawrkar sum puk chhoh dan:
u Congress sawrkar kum 10 (2008- 2018) chhunga sum puk zat: Vbch. 20407.37; Kum khata sum puk zat chawhrualin vbch. 2040.737
u MNF sawrkar kum 5 (2018- 2023) chhunga sum puk zat: vbch. 29772.24; kum khata sum puk zat chawhrualin vbch. 5954.44
u ZPM sawrkar kum 3 (2023- 2026) chhunga sum puk zat: vbch. 18911.51; kum khata sum puk zat chawhrualin vbch. 6876.89
# Kum 2008 atanga Mizoram sawrkar leiba neih chhoh dan:
u INC kum 10 (2008- 2018) chhung leiba zat: vbch. 5411.97; kum khata leiba zat chawhrualin vbch. 541.19
u MNF kum 5 (2018- 2023) chhung leiba zat: vbch. 7322.72; kum khata leiba zat chawhrualin vbch. 1464.54
u ZPM kum 3 (2023- 2026) chhung leiba zat: vbch. 7507.56; kum khata leiba zat chawhrualin vbch. 2730.02