ZPM sawrkarin SASCI sum nuai sing 6 chuang ti ‘lapse’

ZPM sawrkarin SASCI sum nuai sing 6 chuang ti ‘lapse’
ZPM sawrkar hnua sawrkar laipuiin SASCI (Special Assistance to States for Capital Investment) atana sum a dah sa thlap cheng nuai sing thum chuang a lapse a, heng sum hi tha takin hmang nise, a pek belh leh tur (additonal) nuai sing thum chuang bawk, a hma ami nen nuai sing ruk chuang a riral ringawt niin MLA Robert Romawia Royte chuan a sawi a. Chief minister-in SASCI sum hmang tha palina Mizoram nia a sawi pawh hetianga tehna hi sawrkar laipui atangin a awm lo tih an finfiah thu a sawi bawk.
MNF MLA Robert Romawia’n thuthar thehdarhtute a kawmnaah ZPM sawrkar tirh 2023- 2024 khan SASCI Part-I sum sanction sa thlap nuai 23331 chu implementing department hnenah 1st instalment sum a pek tlai avangin a lapse a. Hei hi Assembly Session-a a zawhna finance changtu chief minister-in a chhannaah nemngheh a ni, tih a sawi.
Sum lapse chhan hi, he sanction-a 1st installment 66% dawn tawh si, implementing department-ah pe chhuak loa sawrkarin Finance department-a a kawl tan tlat vang a ni, tiin, “Financial management thiam loh vanga nuai 23331 riral hi a pawi a, heta tanga central leh state sawrkar sum chan ve tur GST leh labour cess pawh nuai 4433 a ni a, a lapse tel vek,” a ti.
Kum 2025- 2026 ah SASCI Part-I hnuaiah Mizoram tan nuai 32800 dah sa niin, Part-I hi ‘untied fund’ infrastructure eng atan pawh hman theih a ni tih a sawi a. Dahsa (allocate) a nih ang leh Mizoram sawrkar dil angin nuai 32800 chu project 41 atan sanction a ni a. Mizoram Finance department pawhin he sum atan hian administrative approval (AA) a pe thlap bawk a. SASCI Part-I dan angin nuai 32800 a 66% (nuai 21648) chu 1st instalment-ah Mizoram sawrkarah rawn release nghal a ni tih a sawi a ni.
“1st instalment nuai 21648 hi dawng reng siin utilisation certificate (UC) an thehluh theih loh avangin 2nd instalment sanction sa thlap nuai 11152 chu a lapse leh ta vek a. Mizoram Finance department-in administrative approval/ expenditure sanction a pek vek tawh leh restricted tender hmanga contractor-te work order pek tawh an ni. ZPM sawrkar tirh kum 2023- 2024 ang maiin contractor-te work order pek tawh saah sum a lapse leh ta vak si a, sum lapse hmasa avanga court case khirh tak sawrkarin a hmachhawn mek a, court thutlukna azirin Mizoram sawrkar hian state plan atangin sum lapse zat hi a tum/ rulh a ngai maithei. Chief minister leh Finance minister hian midang dem loin mawh a la ngam tur a ni,” a ti.
Project 41 sanction tawh, lapse leh ta zingah hian AMC huamchhunga project 13 a tel tih a sawi bawk.
SASCI Part-I 2025- 2026 bikah Ministry of Finance Department of Expenditure amendment thar tihchhuah angin, SASCI Part-I a 2nd instalment hmu tawh NE state-ten SASCI Part-I a original amount zat an hmu leh thei a, chu chu Mizoram tan chuan nuai 32800 a ni tih MNF MLA hian a sawi a. NE state dang zawng zawngin he ‘additional’ hi an hmuh theuh laiin Mizoram sawrkar chuan dere pawh a hmu ve loa, 2025- 2026 atana nuai 32800 (additional) dahfel thlap tawh si hi a kum a liam hnuah a dil (hmuh) theih tawh loh avangin Mizoram tana nuai 32800 pawh chu sawrkar kum a liam rualin a liam /riral ta vek tih a sawi.
Kum liamta 2025- 2026 chhunga SASCI Part-I sum sanction sa lapse zat chu nuai 11152 bak Mizoram tana ruahman felsa diam SASCI Part-I additional nuai 32800 chu bo hlen ta nen, ZPM sawrkarin 2025- 2026 chhung ringawta SASCI Part-I hnuai bika a chan (allocate) nuai 43952 a ti lapse vek tihna a ni, tiin, “SASCI hnuaia sum lapse kan tih awmzia chu, Mizoram tana sanction /allocate thlap ni si, sawrkar laipuia kir leh ta daih; Mizoramin a chan (loss) hlen tak sum riral a ni,” a ti.
Chief minister-in SASCI-ah Mizoram a titha a, central-in sum a pe tha a, India-ah a titha 4-na kan ni, tia a sawi thu Robert Romawia hian sawichhawngin, SASCI enkawltu, Department of Expenditure hnena RTI hmanga SASCI hnuaia hnathawh thatah Mizoram 4-na a ni em, tia zawh chu, SASCI-ah performance ranking siam a awm lo, tiin an lo chhang tih a sawi a. CM chu dawt sawiah a puh.
“Sum ti lapse-tu sawrkar hi a scheme/ project enkawltu leh neitu ministry-in an hua in an hmu hniam hle thin. A chunga sawi ang khian sanction sa an ti lapse a, sum peksa an lakchhuah loh vangin Mizoramin kan chân bawk. ZPM sawrkar hnuah SASCI bikah Finance ministry hian Mizoram sawrkar chetchhiatna a hailoa; a hrek ta hial a ni tih chu kum 2026- 2027 atana ‘Hill states’ bik tana sum a pek atang hian a chiang hle,” a ti.