ZPM thli a la tleh zel – Lalliansawta

MLA inthlanpui ang tho in ZPM thli a la tleh zel a, an boruak a kang hle niin an party president Lalliansawta chuan a sawi.
Thawhtannia ZPM office-a inkhawmah Lalliansawta chuan MLA inthlanpuiah Mizoram mipui leh Pathian zarah sawrkarna an chang a, thla 4 hnuah MP inthlan an hmachhawn leh a, an tlin leh theih ngei a beisei tih a sawi. An chak lohna minority area lamah hma an sawn hle a, MP inthlan campaign kick-off an neih hnu ah campaign-a fehchhuakte atanga report an dawn chin atangin ZPM-ah mithar 25767 lawmluh an ni tawh tih sawiin, “MP inthlan hi MLA inthlanpui anga boruak sang a ni thin loa, kan phur tawk lo thin. Chuti chung chuan ZPM thli a la tleh zel a, kan boruak a kang hle,” a ti.
MP candidate tha tak an nei a, tlin an inbeisei sang hle tih ZPM president hian a sawi. Viak tha leh mawngzang tawk chauh tura kum la naupang, tawnhriat nei tha leh tawng lamah pawh harsatna nei lo a ni, tiin, Nomination Committee-in uluk taka an ngaihtuah hnua an thlan niin, an thlang sual lo tih an hria a, Mizoram mipui pawhin an thlang sualin a ring lo, tih a sawi.
MP inthlanah Mizoram mipui vote nei zawng zawng vote thlak vek turin ZPM hruaitu hian a sawm a. India khua leh tui kan nihna leh ringtu kan nih angin kan mawhphurhna hlen chu kan bat a ni tih a sawi. Mizote chu lal nei thin kan ni a, lal tha lo hnuaiah chuan mipui an bet tlawk tlawk a, hrehawm an ti thin. Mah se, lal ban a nih hnuah mipuiin lal kan thlang ta a, kan thlan sual chuan hrehawm ti tur chu mipui kan ni, tia sawiin, “Mizo kan la tlem a, kan tan tlan a, pheikhai rual taka kan awm theih chuan India rama vote tla percentage sang ber kan ni thei a, record siam turin ram mipui inbuatsaih ang u,” a ti.