ZPM thutna lam tur sawi ngam lo hian sakhaw puithiamte rilru ti na – Lal Thanzara

Mizoramin Lok Sabha member a thlan turah ZPM-in an candidate thutna lam tur an sawi ngam lo chuan sakhaw puithiamte rilru a ti na tih Congress president Lal Thanzara chuan a sawi.
Thawhlehnia Lunglei lama a campiagn-naah MPCC president chuan MP inthlan chu Kristian nuai chimih duhtute leh sakhaw tih bik nei lo inbeihna tur a ni, tiin, hetiang a nih laia MNF MP candidate-in a tling a nih chuan Kristian leh hnam hnufual zawkte nuai chimih duhtu NDA lamah thut a tum thu a sawi chu Pathian tana sengkhawmtu niloin thehdarhtu a nih mai a hlau tih a sawi.
ZPM candidate pawh tling ta se, a thutna lam tur a sawi ngamlo chuan kan sakhaw puithiamte rilru a ti na tih a sawi. “Congress MP candidate kan thlantlin chuan, opposition-ah awm palh pawh nise, Kristian state kan nihna anga Kristian nekchep tumtu dodal ngam MP kan thlan avang ringawt pawhin khawvel hmuhah kan mawi dawn a ni,” a ti.
Congress MP candidate Lalbiakzama chuan Prime minister Modi chuan chanchinbumite pawh hmachhawn duh loin, party dang hruaitute thubuai siamsak dan ringawt an buaipui tih a sawi a. India ramah ro an rel leh a nih chuan inthlanpui awm leh hunah dan hnuaiah mumal taka kan inthlan thei tawh loh mai a hlauhawm tih a sawi.
Zawhna chhangin Lalbiakzama chuan, thlantlin niin opposition-ah awm ta pawh nise, a mal dawn chuang loa, NDA-a tel lo MP dang zawng nen an tangho zel dawn tih a sawi. Assam leh Mizoram ramri chungchang zawhnaah, politics-a hmingthat lak tum tawk leka hma lak chi a niloa, tum tak takna nen zirchiana hma lak a ngai tih sawiin, “Sawrkar hna ka thawh ve lai atangin ramri chungchang buaina hi thui tak hre ve in ka lo chhuichiang ve tawh a, hma lak theih dan ngaihtuahna thui tak ka nei. Kan insiamrem thuai loh chuan Mizoram zawk hian kan la tuar ngei ang,” a ti.