Zu bawk hi …

Mizorama dan anga Zu zawrh a nih lai khan Mizoramin kum khatah cheng vaibelchhe 72.86 te a hmu thei a. Khap a nih hnuah pawh, zu leh a zuartu an mante atanga sum lut chu kum khatah cheng nuai za chuang te a la ni fan a; chu mai pawh ni lovin, a kum telin zu atanga sum lut hi a sang chho tual tual lehnghal. Kum 2021-ah cheng nuai 120.9; kum 2022-ah nuai 229.8 a lut a. Kumin 2023 thla thum (quarter khat) chhung hian cheng nuai 58 a tling leh tawh a; heti zat hi quarter tina sum lut zat tur anga chhut phei chuan, kum 2023 chhung hian cheng nuai 232 chuang a lut hman thei tura ngaih a ni.
Zu hi state revenue hmuhna tha tak ni mah se, chu chu it thei lovin, ‘mimal, chhungkua, khawtlang, khua leh ram pum tana tha lo, chhiatna hrang hrang thlentu a nih avangin zuar lo ngam ang u’ tiin dan anga zu zawrh phalna chu hlipin zu zawrh khapna dan chu kalpui a ni leh ta a ni a.
Hetianga zu zawrh khapna dan kalpui a nih hnuah pawh hian zu leh a zuartu an la awmzui reng a, englai pawhin man tur a awm a, manchhuah loh hi a tam zawk reng hial awm e.
A ruk arala zawrh zu hi a quality a chhe zawk thin a, chu chu zu in mite tan a hlauhawm deuh deuh lehnghal. Zu zawrh khap a nih hnu pawha kum tin cheng nuai za tam man manchhuah tur a la awm reng theih a, dan kan kenkawh mumal leh theih si loh hian, revenue hloh bawk, zu chhia awm phah bawk, zu in miten chhiatpui hma zawk bawk… a chhe zawk hlir kan inhlui ta tihna a ni mai awm e.
Zu hi politics khelhna hman-ruaah hmang mai lovin, a revenue earning lam pawh buk rihtir chuang lovin, ‘engtia kalpui hi nge kan ram tana tha ber tur ni ang’ tih bengsika ngaihtuahna kan sen tak meuh meuh a hun tawh. Khawvel awm chhung chuan zu hi a rem dawn lo. Kan pi leh pute atanga kan rochun chhoh tak zel heng – rakzu, zupui, zufang te pawh a hming chuan kan la chhawm chho zel a. Chutih laiin heng hnam zute hi a quality erawh humhalh chuang si lovin a chhe tulh tulh zawk a, hengte pawh hi kan khap bet thei lo a nih rau rau chuan a humhalh dan hi ngaihtuah zawk hlauh ila, kan thatpui zaw lel mai awm asin.