Zu chhia in vang nia hriat mi pasarih thi

Zu khapna hmun, Bihar-a West Champaran district-ah zu chhia ni ngeia rin in vangin mi pasarih an thi a, thuneituten chhui zuina tur thupek an chhuah nghal niin Pathianni khan police officer-in a sawi.
He thil hi police chuan Pathianni khan an hre tan a, a thi hmasa ber erawh a hma ni lia thi tawh a lo ni a, an vaiin heng mi pasarih thite hi an lo vui vek tawh nghe nghe niin officer chuan a sawi.
District Superintendent of Police Shaurya Suman chuan thite hi an vaiin Lauriya police station huam chhunga mi vek an ni tih a sawi.
Tual chhung mite chuan zu chhia an in avanga thi niin an ngai vek a; mahse, SP erawh chuan a thi hnuhnung pahnih hi chu hetiang vanga thi hi nia an lan loh thu a sawi thung.
Pakhat hi tractor-in a su a, pakhat hi chu zu a châk avanga chiri hmasa phawt a ni zawk niin Suman hian a sawi.
“Thihna thleng hmasa ber hi January 15-ah tawh khan a ni a, keini chuan vawiin khan kan hre ve chauh va. Thi hmasa pangate thih chhan tak hi thil chiang hriat theih a la ni lo va, police-in kan hriat ve hmain mi pasarihte ruang hi lo hal vek tawh a ni a. An thih chhan chhui tur hian investigation team kan din nghal a ni,” tiin Suman chuan PTI a hrilh.
West Champaran Deputy Development Commissioner (DDC), Sumit Kumar pawhin an ruang hal ral vek tawh a nih hlawm avang hian an thih chhan chiang taka sawi mai chu thil harsa a nih rih thu a sawi ve bawk.
“Investigation team hnenah hian an thil hmuhte chu a rang thei ang bera rawn thlen tura tih an ni,” tiin Kumar hian PTI a hrilh.
Team hian ni thum, ni li liam ta chhunga Lauriya-a thi dangte pawh tute nge an nih leh an thih chhan an chhui vek dawn tih a sawi bawk.
Thi zinga pakhat chhungte chuan, “Ka unaupa, Pradeep-a kha a thianpa, Manish-a nen zu an in dun a, an pahnihin an thi ve ve a ni,” a ti.
Bihar-ah hian Chief Minister Nitish Kumar-a kaihhruai sorkar chuan April, 2016 atang khan zu zawrh leh in hi khap a ni.