2023-24 season chu a her liam mek zel a, tualchhung league ngaihven hlawh English Premier, German Bundesliga leh French Ligue 1 khelh zawh a ni tawh a. Europa League final pawh khelh a ni tawh bawk. Kar tawp hian Spanish La Liga leh Italian Serie A hmawr bawk a ni zui leh dawn bawk. 2023-24 season a player lei/lak fuh langsar zual kan tar lang ang.
10. Granit Xhaka
Arsenal captain pawh lo ni hial tawh Granit Xhaka hi German club lian Bayer Leverkusen chuan £21.4m chauh sengin an la lut a, an tifuh cher cher hle. Manager Xabi Alonso chuan Xhaka tawnhriat ngahna hi a chhawr tangkai thiam hle. Premier League-a chuai lam pan hman tawh kha Bundesliga-ah a vul thar leh a, Xhaka hian season a hman that ber tum ni hiala ngaih Leverkusen ah hian a tawng ta hial. Leverkusen hi Bundesliga ah tlawm nei lova champion hmasa ber an ni ta hial a. Inelna hrang hrangah tlawm nei lova kal tluang rei record an siam hial bawk. Hetiang an thlen theih nana player pawimawh chu Xhaka hi a ni.
9. Riccardo Calafiori
Kum 21 leka upa Riccardo Calafiori hi Bologna chuan £3.4m lek sengin Basel atangin an lei a, an hnenah a khel tha zui hle. Left back ni bawk mah se coach Thiago Motta chuan centre defence-ah a chhawr a, a ti fuh viau. Tlarhnung ven thiam Italy ramah meuh pawh central defender mit la ber pawl a ni thei hial a. Bolgona hi tui let hnu lama a vawi khat nan champions league khel turin an tling hial nghe nghe a ni.
8. Jude Bellingham
England rawlthar duhawm Jude Bellingham hi khawvel club hausa leh hlawhtling ber Real Madrid chuan Borussia Dortmund atangin a la a. A manah £88m zet an seng a, a man hi £114.5m thlenga pung chho thei a ni nghe nghe. Bellingham manah hetiang zat hi seng mah se an tisual lo viau a, Ballon d’Or dawn phu khawpin Real Madrid tan hian a khel tha.
Bellingham hian Real Madrid tan goal 23 a thun der tawh a, La Liga-ah a champion pui bakah champions league final a hruai thleng bawk.
7. Marcus Thuram
Inter Milan chuan Marcus Thuram hi Borussia Monchengladbach atangin an la lut a, a lak nan sum an seng lo. Free transfer-a an lak luh Thuram hian Inter Milan tan goal 15 ngawt a thun a, Lautaro Martinez nen an inkawp fuh hle. Thuram an lak fuh em vang hian loan-a an lo hawh tawh Romelu Lukaku an ngaihna zawng zawng a bo zo ta hial a. Inter Milan hi Serie A champion an ni ta hial nghe nghe a ni.
6. Viktor Gyokeres
Portugal club lian Sporting CP chuan English championship club Coventry City atangin Viktor Gyokeres hi an la a, amanah £17m an seng. Top flight football la khel lo ni bawk mah se an la fuh hle. A club thar Sporting Lisbon tan hian inelna hrang hrangah goal 43 zet a thun ta hial a. A chet that em vang hian Premier League club lian ten lak tumin an ngaihvn mek a. Season tharah chuan club lian zawkah, hlawh sang zawk hlawhin a khelh a beiseiawm.
5. Victor Boniface
Bayer Leverkusen in £17m senga an lak luh Boniface hian hliam vangin thla hnih leh a chanve zet a club thar tan a khel thei lo naa season a tawp meuh chuan goal 21 a thun tling der tawh. Leverkusen manager Xabi Alonso chuan thahruingah leh ball kang dawng thei tur a mamawh a, a mamawh chhanna chu Boniface hi a ni. Season liam ta maiah Leverkusen in £17m senga an lak luh Boniface hlutna hi a let thum vel ngawtin a sang der tawh niin tarlan a ni.
4. Artem Dovbyk
Spanish La Liga-ah club lian tia sawi tur ni lem lo Girona chuan Dovbyk hi £6.6m sengin an la a, an tifuh viau. Ukraine international hian goal 21 zet a thun ta hial a. A goal thun zat hi forward langsar Robert Lewandoski thun zat aiin goal thum ngawtin a tam zawk ta hial. Girona hi rin phak bakin an chetha ta reng bawk a. La Liga-ah pahnihna niin, tui let hnua a vawi khat nan Champions League an khel dawn ta hial a ni.
3. Alexander Sorloth
Villarreal chuan La Liga-ah goal 23 thun a, top-scorer ni mek Alexander Sorloth hi £8.5m sengin an la lut a. A goal thun zat atang hian an lak fuh zia a chiang nghal viauin a rinawm. Real Sociedad-ah kum hnih chhung loan a lo khel tawh Sorloth hian Villarreal tan La Liga-ah vawi 33 khelin goal 23 a thun a, match khat chauh khelh hmabak awm tawhah goal hnihin hma a hruai mek.
2. Pierre-Emerick Aubameyang
French club lian Marseille chuan forward tawnhriat nghah tak Pierre-Emerick Aubameyang hi Chelsea atangin an la a, a man atan tangka dere em pawh an seng lo. Kum 35 lai tling ve tawh mah se Aubameyang hian goal thun a thiam thin kha a la theihnghilh hauh lo va, Merseille goal thun khawl a ni leh nghal. Aubameyang hian season liam taah khan rawlthar duhawm zawk Bellingham, Bukayo Saka leh Phil Foden te aiin goal a la thawkchhuak tam zawk cheu a. Europa League-ah goal 10 thunin, top-scorer a ni hial a ni.
1. Alex Grimaldo
German champion thar Bayer Leverkusen in manager thar atan Xabi Alonso an ruai a, Alonso hian player thar la lutin team thar a ni. Manager atan Alonso an rawih fuh ang bawkin player an la fuh a, player lak fuh 10 zingah an player pathum ngawt an lang hial a ni.
Bayer Leverkusen hjian Grimaldo hi Benfica atangin a thlawnin an la. Wing-back Jeremie Frimpong nen an inkawp fuh hle a, hei hi Grimaldo lansarh lehzual chhan a ni. Grimaldo hian Leverkusen tan goal 17-ah a inrawlh a, goal 12 a thun.
2023-24 Season a player lak fuh zual 10
Get real time updates directly on you device, subscribe now.
Prev Post
Next Post