February ni 11 a sem tur 2023 BRIT Awards ceremony-a perform tur an puan belh zingah Harry Styles a tel a, Styles hi kumin BRIT Awards-ah hian nomination pali neiin, album of the year, artist of the year, pop/R&B act leh song of the year-ah te a lang bawk.
-- Advertisement --
Kumin BRIT Awards-ah hian Wet Leg leh Sam Smith leh Kim Petras te chu perform tura puan tawh an ni a, award hi O2 Arena, London-a sem tur niin, Styles hi BRITs-ah a mimal anga tum hnih a perform-na tur a ni tawh a, 2020 khan a lo perform tawh bawk a ni.
Harry Styles sawi takah chuan tunah hian North American tour a neih mek ‘Love on Tour’ chu a khar dawn hnai tawh a, January ni 26,27 leh 29-ah Los Angeles-ah show a nei ang a, chutah January ni 31 leh February ni 1 zanah tour kharna, final show Acrisure Arena, Southern California leh Greater Palm Springs-ah te show a nei leh bawk ang.
He tour hi September ni 4, 2021 atanga a tan tawh kha niin, tour ticket maktaduai 2.6 hralh tling tawhin, ticket man tling khawm pawh dollar maktaduai 338.9 a tling a, tour a neih chhung hian show tum 120 a nei hman a, North America, Latin America, Australia, New Zealand leh Asia te a hrut kual a ni.