Super Bowk halftime show-ah a perform a, Oscar-ah a perform leh dawn bawk a, kum khat thil thua hetiang stage lian pahniha perform ve ve thei zaithiam hi an tam lo khawp mai, Rihanna tan kum bul tan dan tha tak a ni a, a fa pahnihna tur a pai mek bawk.
Rihanna hian Super Bowl halftime show-ah khan a hla hrang hrang a medley a, mahse, khang a hla sak zingah chuan Grammy leh Oscar-a nomination a neihna hla ‘Lift Me Up’ a sa tel lo tlat maia, he hla hi March ni 12-a Oscar award semnaah a perform dawn avangin a lo khek khal a nih hmel e. He hla hi Black Panther: Wakanda Forever soundtrack a ni.
Super Bowl halftime show-ah khan a naupai dul pawh a puar ve deuh âl tawh a, March ni 12-ah phei chuan a lian ve hman tawh viau dawn a ni.
Kum khat thil thua Super Bowl halftime show leh Oscar-a perform kawt thei hi an la tam lo hle a, Rihanna tih lohah chuan Phil Collins chiah a la awm a, 2000 khan heng stage lian pahnihah hian kum khatah a perform ve ve a, mahse, Collins hi chu Super Bowl halftime show-ah hian a headline-tu ber a ni lo va, Christina Aguilera, Enrique Iglesias leh Toni Braxton te nen an inlan ho a, Tarzan film hla ‘Two Worlds’ a perform nge nghe a ni.
Oscar Award semnaa zai tura sawm te hi chu huhang nei lian, lar lamah pawh a ber kai an ni deuh zel a, nikum khan Oscar show hi Beyonce-i’n ‘Be Alive’ hlain a kick off a, Adele, U2, Lady Gaga, The Weeknd, Sam Smith, Justin Timberlake, Sting, Elton John leh Billie Eilish te pawhin Oscar nomination-a an lanna hla an lo perform tawh bawk a ni.
2023 Oscar-ah Rihanna perform dawn
Get real time updates directly on you device, subscribe now.