Selena Gomez chu hmeichhe zinga Instagram-a follower ngah ber a ni ta a, follower maktaduai 381 a nei tling ta. A hmaa hmeichhe zinga follower ngah ber chu Jylie Jenner a ni a, ani hian follower maktaduai 380 a nei a, Selena hian a rawn lehpel ta a ni. Hetihrual hian Gomez hian social media chawlhsan leh rih a tum thu a puang bawk.
Hmeichhe lama follower ngah ber ni mah se a nawlpui thua follower ngah ber Cristiano Ronaldo chu a la pha lo hle a, Ronaldo hian follower maktaduai 551 a nei a, footballer Messi pawhin follower maktaduai 432 a nei tling a ni.
Selena Gomez Instagram-ah a active lo khawp mai a, a phone atangin he social media app hi kum li vel kalta khan a delete daih kha a nia, chutah kumin January-ah a rawn lang ve leh tan chauh a ni.
Selena Gomez hian TikTok-ah social media a chawlhsan rih tur thu hi a puang a, “Ka tha. Ka nihnaah hian ka lawm a, ka pawi sa tehchiam lo. Ka lian emaw lian lo emaw ka ngaipawimawh ber lo. Ka nihnaah hian ka lawm tawh. Tichuan, social media hi ka chawlhsan leh rih dawn, a chhan chu hei hi a atthlak deuh hlek tawh a ni. Kum 30 ka tling tawh, hetiang atan chuan ka upa tawh mah mah. Mahse, invaiin ka hmangaih vek che u! Kan inhmuh leh thuai dawn nia. Engkim hi ka chawlhsan rih lawk dawn a ni,” a ti.
Selena hian hman deuha social media a chawlhsanna chhan sawiin, InStyle-in an kawmnaah, “Social media ka chawlhsan kha rilru hriselna atana thutlukna ka siam fuh ber te zing ami a ni” a ti a, “Passowrd ngai lo nun, phone ka dah ruala tul lo taka min ngeitute comment leh min khaikhinna te bo nghal vek mai nun kha a hahdamthlak a ni,” a ti.
Hmeichhe zinga IG-a follower ngah ber Selena Gomez-i’n social media chawlhsan dawn
Get real time updates directly on you device, subscribe now.
Prev Post