Inrinni zan khan Hyve Aizawl City all-ah Octave Mizo Choir music video ‘Pawnto Hla leh Pipu Zai’ chu Tourism Minister Lalrinpui’n a tlangzarh. He music video hi Octave Mizo Choir leh Mizoram Tourism Department te thawhhona a buatsaih a ni.
Pawnto Hla leh Pipu Zai hi Lalsiamkima’n Pawnto hla hrang hrang leh Pipu Zai, a nihna bo si lo a thangtharte pawhin an ngaihthlak chak zawng a nih theihna tura mawi danglam taka a remkhawm niin, Octave Mizo Choir hian beng fah zetin an rawn sa chhuak a, Mizo hnam tana music video hlu tak a nih ngei a rinawm.
Octave Mizo Choir hi January ni 1, 2023 ah din niin tuna an Project ‘Pawnto Hla leh Pipu Zai’ hi an Music Video 5-na a ni nghe nghe. Octave Mizo Choir hian an Music Video siam tum hian hun engmaw chen an lo buaipui tawh a. Recording te nei hmasain Kings & Prophets leh Ace Studio-ah te recording hi an ti a.
Music Video hi zaipawl zai chauh lang lo deuh, Mizo hnam ziarang pholang thei, thangtharte tan pawh a ennawm tak, a hla nena inrem bawk si a siam niin, Paia Pachuau direct a ni. Paia hian story line tha tak siamin music video hmuhnawm tak turin a rawn duang chhuak ta a ni.
Pawnto Hla leh Pipu Zai hi Octave Mizo Choir YouTube channel-ah a duh apiang tana en theih turin dah (upload) a ni a. Zonet leh LPS lamah pawh kan hmuh thuai a beisei awm.
Pawnto Hla Leh Pipu Zai Music Video
Get real time updates directly on you device, subscribe now.
Prev Post