2025 Oscars chan loh khana chhuak

2025 Oscars chan loh khana chhuak
Oscar an sem meuh hi chuan a hmain award chi hrang hrang- Golden Globes, Crirics Choice Awards, Screen Actors Guild Awards leh BAFTA te an lo sem hman tawh thin bawk a, category thenkhata award dawng tur hi chu a rin lawk sa deuh ruak theih tawh thin. Mahse, kumin chu cetegory pawimawh thenkhat chu rin lawk hleitheih loh a awm a, best picture, best actor leh best actress bakah best original song leh best original score te pawh a chiri deuh tlat.
Chutihrualin category thenkhat chu zawlnei ni lo tan pawha sawi lawk theih deuh roh a ni ve tung a, Kieran Culkin chu A Real Pain film avanga best supporting actor dawng tura rin lawk sa deuh thup a ni a, an ring dik ta reng a. Chutiangin, Zoe Seldana pawh Emilia Perez avangin best supporting actress a rinkai ber a ni a, hei pawh a dik leh chiah!
‘Wicked’ pawh best production design leh best costume design dawng tura rinkai a ni a, an ring dik. ‘The Substance; pawh best make-up & hairstyling-a rinkai ber a ni a, Emilia Perez-in sawiselna a dawng tam avangin ‘I’m Still Here’ pawh best international feature a rinkai a ni zui a, ‘Dune: Part Two’ pawh best visual effects dawng tura rinkai a ni bawk. Heng te hi an lo ring lawk dik thlap!
Mahse, hei chu chan loh khana chhuak lam a ni ve thung. Bob Dylan biopic ‘A Complete Unknown’ chuan nomination pariat a neihah award a dawng lo tlat. Kum hnih kalta khan biopic dang ‘Elvis’ pawhin nomination pariat nei chungin kut bengin award semna atangin a chhuak taw bawk.
Bob Dylan lema chang Timothee Chalamet chu best actor dawng tura rinkai zingah a tel a, mahse, he award hi The Brutalist changtupa, thawm nei lian lo zawk Adrien Brody-a’n a dawng ta zawk. Chalamet channa dang ‘Dune: Part Two’-in award pahnih a dawng ve thung.
Emiliz Perez pawhin nomination 13 nei chungin award pahnih- best original song leh best supporting actress chiah a dawng. Oscar history-ah nomination 13 chin nei zinga award dawng tlem ber a la ni. He film hi international feature film dawng ngei ngei tura rin ni mah se hei pawh a dawng ta lo a, ‘I’m Still Here’-in a dawng ta zawk.
Diane Warren pawh a la vanduai ta zel a, Oscar nomination 16 nei tawin, award a la dawng miah lo! Oscar history-ah hetiang zat nomination-a lan tawh hnua award dawng lo hi midang pakhat chiah a la awm. 2023 khan Diane Warren hian Academy atangin honorary Governors Award a dawng a, songwriter zinga he award dawng awm chhun a la ni a, Academy-ah duhsaktu a ngah tih pawh a hriat theih. Chuvangin, kumin Oscar-a The Six Triple Eight film atana a hla ‘The Journey’ chuan award a dawn ngei tawh ring an tam hle a, Emilia Perez hla ‘El Mal’-in a dawng leh zawk tlat.
Elton John pawh documentary ‘Elton John: Never Too Late’ a la ‘Never Too Late’ avangin best original song dawng tura rinkai a ni a, mahse, a dawng tlat lo. Tun hi Oscar-a nominate a nih ve tawh a award a dawn loh vawi khatna a ni. 1995 khan The Lion King hla ‘Can You Feel the Love Tonight’ avangin award a dawng a, 2020-ah Rocketman hla ‘(I’m Gonna) Love Me Again,’ avangin a dawng leh bawk. Kumin chu he award hi British rocker Mick Jagger-a’n a dawng ta zawk.
Anora director Sean Baker-a’n best film editing a dawng nawlh hian mak tih a hlawh ve tlat, He category-ah hian Conclave chu award dawng tura rinkai a ni. Sean Baker hian Best Picture, Best Director, Best Original Screenplay a dawng tel a, zan khat thil thua film pakhat avanga Oscar pali dawng thei hmasa ber record a siam zui ta a ni. 1954 khan Walt Disney pawhin zan khatah Oscar pali a dawng tawh a, mahse, ani hi chuan film chi hrang hrang avangin award hi a dawng ve thung a, anni pahnih chiah hi zan khata Oscar pali dawng thei awm chhun an la ni bawk.
‘Flow’-in best animated feature a dawng nawlh pawhin mak tih a hlawh khawp mai. Hetiang lam lo chingchip thin te chuan ‘The Wild Robot’ chu he category-a award dawng ngei turah an ngai deuh vek a, mahse, ‘Flow’-in award a hum haw ta zawk. ‘Flow’ hi indie film he category-a award dawng hmasa ber a nih bakah Latvian film zinga Oscar hrim hrim dawng hmasa ber a ni bawk.