2026 WC final khelhna tur MetLife Stadium

2026 WC final khelhna tur MetLife Stadium
New Jersey khaw khelmual MetLife Stadium chu kum 2026 World Cup final khelhna tur atan an tifel a, July ni 19-ah chuan khawvelin he khelmual lam hi a hawi rual thup dawn a ni.
Tarlan tawh thin angin, he mi kum world cup hi ram pathum – USA, Mexico leh Canada-te’n an inthlentawm dawn a; US-in final match a thlen laiin kum 1986 World Cup-a Argentina-in an hmelma lian England an hneh tuma Diego Maradona ‘Hand of God’ goal kan hmuhna Mexico City-a Azteca Stadium kha opening group game khelhna tur ni ve thungin, June ni 11 zanah he khelmual behchhan hian tournament tan a ni ang.
Ram pathum inthlentawm tur 2026 World Cup hi tunhma ang lo takin team 48 inelna tur niin, world cup khelh chhung rei ber tur hian ni 39 ngawt a awh dawn a ni.
Mexico hian kum 1970 leh 1986 khan Fifa tournament lian ber hi a lo thleng tawh a; US leilungah kum 1994 khan nghah a ni ve tawh bawk.
Canada chuan world cup an thlen vawikhatna tur niin he rama match hmasaber chu Toronto khawpuiah June ni 12-a khelh tur niin, United States opening pawh So-Fi Stadium, Los Angeles-ah June ni 12 thoa khelh tur a ni.
Tarlan chamchi tawh thin angin, Mexico rama kum 1986 quarter-final match sawi zui hlawh kumkhua tawh turah khan mipui 83,000 zet pungkhawm hmaah Argentina striker chuan a kuta a chumluh bakah goal ropui pakhat dang thun telin, Azteca khelmualah 2-1-in England an tlawm a, ‘Hand of God’ goal vanga an rilru nain dam tih ni a nei dawn lo ni hialin a lang!
Kum 2026 final dawltu tur MetLife Stadium hi American football team pahnih New York Giants leh New York Jets-te’n home-ah hmang mekin, New Jersey khuaa East Rutherford venga awm a ni a, fans 82,500 lenna niin, 1994 World Cup-a host stadium pakhat a ni.
Pathianni khan 2026 tournament match pawimawh nghahna tur puan inkhawm buatsaih niin, Fifa president Gianni Infantino bakah comedian and leh actor Kevin Hart, rapper Drake leh celebrity Kim Kardashian-te inlanho tum hian third-place play-off match khelhna tur atan Miami an puang fel nghal.
Quarter-final chin chung lam chu US khawpui pali – Los Angeles, Kansas City, Miami leh Boston-te’n an thleng dawn a; Dallas leh Atlanta-ah semi-final match hnih khelh tur niin, game thleng hnem ber tur Dallas khawpuiah hian match kua khelh a ni ang.
World Cup draw hun hi nakkum lam daih a nih hmel a, tute nge openingmatch khel dawn tih lam kha hriat theih a la ni rih lo.
2026 World Cup khelh hun chhung hi 2022 Qatar ai khan ni 10 zetin a rei zawk dawn a; Mexico ram khawpui pahnih Monterrey leh Guadalajara bakah Canada khawpui pakhat Vancouver telin he tournament hi khawpui 16-a khelh tura ruahman a ni a, US lama khawpui hming la tarlan lohte chu Philadelphia, Houston, Seattle leh San Francisco-te an ni.
He’ng khawpui hming lamchhuahte zinga knockout game thleng lo tur awmchhun chu Guadalajara chiah a ni a; team tin hi game an khelh inkarah an thlawk kual viau dawn a ni.
Quarter-final leh semi-final match khelhna inkar hnaivai ber chu mel 500 zeta inhlat Kansas City leh Dallas niin, last eight match khelh zawha last four match khel tura zinkawng thui ber thung chu mel 2,200 lekin a daidan Los Angeles leh Atlanta khaw inkar a ni thung.
A hma zawng aia team chhuak an tam dawn avangin a khelh dan kalphung pawh herdanglam bawih a ngai dawn a; format tharah team 12 zel awmna group pali siam niin, a vawikhatna atan last-32 knockout round kan hmu bawk ang.
He tournament thlengtu ram pathumte hian an ram theuhah group stage an khel zo vek thei dawn a; US hian LA-a game hnih an khelh bakah Seattle khawpuia match khat an khelh dawn bawk avangin an ram khawthlang lam tuifinriat kam hrul velah hian knock out round thlen hma chu an thenkual thei dawn a, zinkawng hla zawk an pumpelh thei dawn.
Canada chuan Toronto khuaah group stage game khat khelin, Vancouver lamah match hnih an nei tel a; Mexico chuan Azteca-ah game hnih khelin, Guadalajara lamah match khat an khel thung ang.
Fifa chuan an ruahmanna hmasa tar-chhuah tak hi national team coach leh technical director rualho telin he tour-nament-a chanpual neihote an biakrawn hnua thutlukna siam an nih thu an sawi a; match 104 khelhna tur he world cup-ah hian team tinin match khelh inkarah ni thum zel chawlh an nei dawn tih an tarlang tel.