Argentina captain Lionel Messi chuan 2026 World Cup a khelh dawn leh dawn lohah thu a la pawtchat lo a, khel lo turah a la indah dawt lo!
-- Advertisement --
Kum 35 mi ni tawh Messi hian nikum Qatar rama 2022 tournament kha World Cup a khelh tawpna tur a nih thu lo sawi tawh mah se kha tournament-ah khan best player ni thei khawpin a la tal na thei a, kum thum hnua USA, Canada leh Mexico inthlentawm tur 2016 World Cup pawh hi a la hawisan fithla lo a, mahse, a kum a tam ve tawh avangin huphurhawm lam hret a nih tawh tur thu a tarlang tel.
“Kum lo tam ve zel hian 2026 World Cup khelh a tiharsa dawn ngei mai a, chutih laiin football khelh hi ka lungawina ber a ni a, hliamin min tibuai lo se, taksa han in fit zel bawk se, tuna kan tuina ang hi a la pangngai chho zel a nih chuan kan la tinzawn ang chu.
“World Cup lo thleng leh tur hi a la hla khawp mai a, ka inlan theih dawn leh dawn loh chu ka career kal zel dante pawhin a hril tel ve bawk ang chu,” tiin Argentine publication Diario Olr hnenah a rilru puthmang a sawichhuak.
Khelh harsa ber Mexico
Lionel Messi hian tunhnai khan nikum World Cup-a match khelh harsa a tih ber tarlangin, final penalty shoot out hmanga an hneh hram France leh 1-2-a an ngam loh Saudi Arabia-te kha tumpui khirh ber an nih loh thu a sawi!
Tunkar Thawhtanni daih tawha Argentina radio station Urban Play-in an kawmnaah Argentina legend-in FIFA World Cup Qatar 2022-a hmachhawn khirh ber a tih chu Mexico an ni teh daih!
Argentina hian Messi leh Enzo Fernandez-te goal khat ve ve tihluh hmangin Mexico kha sihnih faiin an hneh a, Poland hneh bawkin, an group standing-ah a sang ber ni chungin knock out round an lut a nih kha.
Messi hian Mexico hmachhawn harsa a tih thu sawiin, do-or-die matcha nih tawh avangin chak ngei ngei an ngai a, chutih laiin second half minute 64-a an goal hmasa zawk a thun hma zawng khan 0-0 a la ni vung vung a, chak loh ruala puanthuah tel nghal ngai an nih tawh avangin kha game kha a harsa ber niin a sawi.
“Eng vang pawha chak kan ngai a, kan din-hmun avang khan danglam deuha kan khelh a ngai.
“Mexico game a harsat ber chhan kha chu engkim tawpna thlen thei a ni miau a, kan khelh dan pawh a duhawm loh ber tum a ni zui ta nghe nghe,” tiin Ballon d’Or tum sarih dawng tawh chuan a sawi.
Mexico an paltlang hnu khan sihnih fai bawkin Poland lakah Messi and Co. an chak leh a, round of 16 an lut.
An bultanna inkhela Saudi Arabia an hneh lo ringawt khan an inrintawkna a pawthniam lo thei lo a mahse, chak ngei ngei an mamawhna game-ah Mexico an hneh a, final thlengin rilru paukhauhna nen tournament an khel chhuak thei.
Club goal ngah ber Messi
A elpui lian ber ni kum-khua Cristiano Ronaldo hma-khalhin Paris Saint-Germain forward Messi chuan khawvel league lian zual panga zinga club goal thun hnem ber nihna record thar a neih belh.
Nilaini zan French Ligue 1 inkhela PSG-in 3-1-a mualneitu Montpellier an hnehna inkhelah khan Argentine hian second half laihawlah mikhual goal hnihna khungin, he a goal khat neihbelh leh nen Lionel Messi hian season kal laiah league goal kua thun tlingin, a career-a league game 833 a khelhah goal 697 a khawl tling chiah a, goal khata Cristiano Ronaldo lehpelin history-ah khawvel top 5 league-a club goal thun hnem ber nihna a chang thar a, Portuguese Ronaldo ai hian game 85 zetin a khel tlem zawk bawk.
Ronaldo tana Messi record tluk emaw khum emaw a har tawhna tur chhan chu Arab lamah sum tam zawk umin a khel tawh a, khawvel league lian zual pangaa a khawi emaw berah hian a kirleh a nih pawhin uaithla lam a lo pan zual tawh ang a, record break tur chuan a harsa tawh deuh mai thei!
Montpellier laka a goal kha season kal lai inelna hrang hrang belhkhawma PSG tana a goal 14-na niin, a club vawn lai tan belhkhawma a goal 25-na a ni nghal bawk.