25% ka la lo – Lalruatkima

Rural Development hnuaia hnathawnaa 25% cut awm anga sawi thin chu thudiklo a ni a, an la lo tih RD minister Lalruatkima chuan a sawi a. Heti anga Assembly House-a member-ten an sawi thin chu House zahawmna a tichhia nia a ngaih thu a sawi.
Assembly Session-ah Congress member C Ngunlianchunga chuan Lawngtlai district Sabualtlang to Pillar No.10 Sabualtlang hna thawh a nih dan a zawt a. Km.7 vel maintenance tihna, minister-in a chhan danin, side drain siamna tura cheng nuai 15 dah chu a thil siam tur leh sum dah hi inmil loa a hriat thu a sawi a, sawirik tawh thin angin ‘25% deduct’ tum a nih leh nih loh a zawt. BADP kalpui danah ACB case a luh mai a hlauhthawn thu leh officer-ten an tawrh a hlauhawmthawnpui thu te a sawi bawk.
RD minister chuan House chhungah diklo taka inpuhna a awm a, tumahin 25% an lak a ring lo tih sawiin, “Hetiang fiamthu, House zahawmna tichhe thei ang chi, a finfiahna awm si lo House member-ten an sawi thin hi House zahawmna a tichhia niin ka hria a, 25% kan la lo,” a ti.
BADP hna chungchangah third party monitoring te, social audit unit te an nei thlap nia sawiin, chu’ngte chuan uluk takin an audit a, audit report hi ministry-ah thehluh vek a ni a, geotaging hmangin thawh hma, thawh mek leh thawh tur te upload vek zel a ngai bawk tih Lalruatkima hian a sawi.
Pillar No.10 chu border area, venhim ngai, Myanmar hel Arakan Army-te inbenbel avangin Assam Rifles-in BADP proposal siam laiin an rawn propose a, anmahni propose anga hma lak zui a ni tih minister hian a sawi bawk.