Hnathawh dan sawifiah theih loh chuan bang turin Tourism minister phut

Tourism department hnuaia Reiek Tlanga hnathawh mekah Tourism minister Robert Romawia Royte chu insawifiah turin ZPM party chuan an phut a. A insawifiah thei lo a nih chuan bang turin an phut tih an sawi.
ZPM Publicity Committee sawi danin, Tourism department hnuaia Reiek Tlang hmunhma tihchangtlun hna chu DJ Consultancy Services hnenah restricted tender-in cheng nuai 560-a thawh tura pek a ni a; sum hi Ministry of DoNER atanga hmuh a ni. 2020 July 30-a thawh tan tura tih niin, thla 18 chhung, 2021 December ralhmaa zawh tur a ni. Hun tiam chhunga an zawh hman loh avangin thla 13 pek belh an ni a, hemi ang hian 2023 January-a zawh tur a nih laiin, an la zo thei chuang lo. RTI-a zawhna chhan danin, 2022 December 7 thleng khan hna zaa 87 zo tawha insawiin, an hnena sum pek tawh hi nuai 356.485 a ni.
He hna thawh a hmuna an enfiahnaah hnathawh leh sum hman dan a inmil loh hle tih sawiin, an hnathawh thenkhat chu a taka inkawhhmuh tur awm lo a ni tih an sawi. “An hnathawh zawh tawh nia sawi leh department-in sum a pekchhuah hi a inphu lo hle,” Publicity Committee chairman TBC Lalvenchhunga chuan a ti.
DJ Consultancy Services hminga he hna hi hmuh ni mah se, a hmuna hnathawh an endiknaah hnathawktute leh a viltute hi North East Consultancy Services (NECS) hnuaia thawh vek a nih thu a sawi a. Architecture leh structure drawing pawh NECS siam a nih thu an sawi. Hnathawh hmanhmawh thlak leh specialist ngaia hna thlan, restricted tender thawktute chu hming hriat ngai loh, office pawh nei mumal lo, an experience leh work done pawh la hmuh loh an ni tlangpui tih a sawi a. Hna hmanhmawh thlak thawk tura hna pek ni si, an thawh muan em em bakah bul la tan loh pawh tam tak a awm thu a sawi bawk.
“Tourism minister hian a fapa firm NECS a duhsak thin avangin PMJVK hnuaia hna cheng vaibelchhe 107 an pe thei lo a, sum lokal lehzel tur pawh sawrkar laipuiin min pek duh tawh loh phah a ni,” ZPM Publicity Committee chairman hian a ti.
PMJVK hnuaia NECS kuta hna pekah District Council & Minority Affairs-in a duhsak uchuak nia sawiin, Toursim minister Robert Romawia Royte chu insawifiah tur leh a insawifiah thei lo a nih chuan moral responsibility laa bang ngam turin an phut tih an sawi a. DC&MA minister R Lalzirliana pawh he hna special taka an inpek dan sawifiah turin an phut tih an sawi a ni.