2Wheeler taxi leh ruihhlo

Two wheeler taxi-a ruihhlo sem kual thin an awm thu an dawn avangin Central YMA hruaitute chuan transport minister an hmu a, hemi chungchang hi sawipuiin CYMA leh transport department tangkawpa two wheeler taxi puala awareness campaign neih an rawt a.
A vanduaithlakin a pawi thin hle mai a. Khawchhak atanga ruihhlo chi hrang hrang lo lutin kan ram a tihbuaizia chu tlang hriat a ni a. Sawrkar, pawl hrang hrang leh kohhran hrang hrangten an buaipui luai luai a, chutih lai kara mipui rawngbawltu two wheeler taxi khalhtu zingah ruihhlo sem kual an lo la awm lehzel hi chu a lungchhiatthlak hle a, a mualphothlak hle bawk.
Tuna Central YMA ten an rawtna ang hian, two wheeler taxi puala awareness campaign neih hi tihmakmawh niin a lang. Pawl hrang hrangin ruihhlo do an puang a, ruihhlo dovin a takin an thawk chhuak bawk a. Two wheeler taxi pawh hian pawl (ATTA) an nei a, ruihhlo do ve tura ngaih an nih laia mahni tualchhung ngeia a semkualtu zinga an member an lo tel a nih chuan, pawl ang pawhin khauh deuh zawka hmalak dan tur an ngaihtuah ve te pawh a tulin a lang.
Two wheeler taxi khalhtute hi an fel hlawm hle a, thenkhat chuan Pathian thuziak te pawh an passenger-te an sem thin hial a. |henkhat erawh, taxi fare pangngai aia uchuak deuha passenger-te taxi fare thing duh an awm zauh zauh bawk. Hemi chungchangah pawh hian, mipui rawngbawltu an nih hria a, an eizawnna zahawm tak hi dik tak leh rinawm taka vawng tlat turin, anmahni puala awareness campaign neih hunah, ‘taxi fare’ chungchangah pawh hian hma lak tel nghal theih nise a duhawm hle a ni.
Two wheeler taxi kan sawi mek laiin, taxi pangngaiah pawh hian, thuneitute hian taxi fare sang uchuak lutuk thin hi ngaihven se, hei hi mi harsa zawkte tan chuan a manganthlak takzet a; sawrkarin taxi fare book a siamte khan awmzia a nei tawh lo a ni. Tuna taxi fare lak dan tam tak hi chu lang renga mipui rawk mawlh mawlhna (daylight robbery) chi khat a ni ta ber awm e.