By Lalhmangaiha Sailo
Holy Cross Bakery
Ph : 9436360275
-- Advertisement --
MOTOR KAWNG LAIH : Rambuaiin ziaawm lam a la pan meuh lo chungin Mizoram chu U.T ah hlankai chhoh kan han ni a. Sawrkarin hmasawnna lam hawiin hma a rawn la tan a. Tlawng ral thlang lam “Hnuchhawn ram” tih thinah pawh BRTF hoin Sairang – Tuipuibari kawngpui laiin W.Phaileng an thleng tawh a ni. Mamit lam motor kawng pawh P.W.D in Lengpui atangin Serzawl lamah Saitlaw tlang tan liamin Vaak kaiah TUT kana Mamit lut tura laih tan a ni a. Kum 50 (sawmnga) zet a lo ni daih tawh mai. A bul tan tirh tea Sawrkar (Department) ruahman dan leh hmalak dante hi thangtharte hriat ve mai mai atan te pawh han tarlang ila, a ngaihnawm ang reng a, kan khawtlang hmasawnna tur kawnga theihtawp a lo beitu kan khawtlang hruaitute hriatrengnan te pawh a ni ang chu.
Phase khatna hi P.W.D hnuaia Register Contractor ni lem kher lote tan pawh Tender chhan theih a ni a, mi engemawzatin Tender chhangin thawk an awm nual bawk a ni. Inhlawhna mai tur heng hun lai hian a vang bawk a, kawng lai inhlawha group group-a thawk pawh an thahnem viau a ni. Phase khat an zo, Department-in Tender an chhuah leh hma chuan Mamit khawtlang hruaitute chuan Committee pawimawh tak an nei a, hetiang hian thu an rel : Lengpui – Mamit motor kawng laih hian Mamit a thleng lawk dawnin a lang lo, Tut lei la dawh ngai tur nen, hawh u, thuneitute hnen lamah cancel dil mai ila, BRTF kawng laih mek Dapchhuah atanga pengin Tut dung zuiin Dampui leh Luangpawl ram chhuahlamah Luangpawl dai Lungsir hnuaiah emaw Mamit Project field a chhuak phei turin hmalak zawk nise tih an han dil a. A hmuna rawn enchiang turin Er. G.Lalhmingthanga, S.D.O., P.W.D an rawn tir a. Khawtlang hruaitute chuan Mizo veng Pu Chalzawna leh Hmunsam veng Pastor Liandova te intlang atangin Saitlaw tlang leh Vaak ruamte chu kan thlirpui a. Hmabak a la thuiin leh a ram a la pilril bawk nen, chik taka kan thlir leh kan sawiho hnua a haw chhoh hnu lawkah Lengpui – Mamit via Saitlaw kawng Phase khat laih tawh chu chhunzawm lo a cancelled in Dapchhuah atanga laih tan leh zawk turin thu an rawn ti ta.
TIHSUAL VAWI HNIHNA: Dapchhuah chhak deuh hlek atanga Dampui leh Luangpawl ram chhuahlamah zal phei taka laihtlang phei a, Mamit lut mai tur chu Dampui khua paltlang chhoa laih chhoh tura tih a ni leh ta zawk tlat mai. Dampui khaw paltlang tur hian Pu Vela (Vel Union-a) hming lem nei hial khawpa Union pa chuan theih tawpin Pu Ch. Chhunga, Ch. Saprawnga leh C. Pahlira te hnenah Dampui khua paltlang ngei tura a tahawh leh a han dil sek chu ngai pawimawhin an lo thlaksak ta mai a, Dampui paltlangin zo ngawpui a tan tlang phei ta a ni. A mak lo e i ti tawh mai mai teh ang, Seling thlen dawn kawipui pawh khi tun thlengin Nuthlawi kawipui an la ti a ni lawm ni kha?
Brig. T.Sailo, Mamit bialtu MLA a nih hun lai khan vawikhat chu a bial fanga Mamit a tlawh tumin ka tel ve a. Dapchhuah leh Dampui inkar kan kal laiin Aisial kawnah kan chawl a, chutih lai chuan kawng thlang lam a thlir thla vung vung a, min rawn ko a, “Hmangaih, Mamit kawng hi a dik lo, khulai atang khuan phei nuam takin Mamit a lut thei a lawm!!” a ti a. Tlang chhip kham kara chhoh a tha lo, Mamit kan thlen a Deputy Commissioner Office-a Meeting neihnaah pawh a sawichhuak a. National Highway-in hma te a rawn lak hunah chuan sawn thlak ngei ni se tih thu a sawi zui nghe nghe a ni.
TIHSUAL VAWI THUMNA: Mamit P.W.D kawng chu NH-108-in a rawn hma tan ta. Kawng pangngai tibuai lutuk loin Lengpui, Lengte leh Rawpuichhip khaw helna kawngte chu rei tak an thawk a, an han zawh meuh chuan a Grade te a thain a zau nuam bawk a, a lawmawm khawp mai. Dapchhuah-Mamit kawng Dampui khaw helna erawh hi chu, beisei ang a ni lo deuh lo maw!!? Ruahmanna hmasa ang leh Brig. T.Sailoa thlirna ang deuhin tun aia hnuai deuhah hi chuan kalin Luangpawl khaw hnuaiah Lungsir vela chhuak ni ta zawk se, Dampui – Zotlang ngawpui mawi leh chhuanawm tak kan han thiat ringawt pawh hi a uiawm lutuk. Lei min, kawngpui hnawh thenfai kum tin ai chuan ruahmanna hmasa anga bul tan leh mai hi khuarei atan a tha zawk mai lawng maw tih ngaihdan te pawh zuk awm a!!
Tuna Dampui khaw hnuai kawngpui thar Thlaithar Bazar hmun phei mual rem laiah khuan Dampui khua chu sawn thlak ni ta se – Dampui khaw hlui leh zo ngawpui la awm te khu uluk taka enkawl leh humhalh a cheimawi deuh ni ta se, Mamit khawpui thang chho mek tan pawh hahchawlhna nuam tak a la ni ngei ang le.
Heng hun laia Parts pawimawh tak tak latu ten mual min liam zawhsan tawh a, mahni chauhin tumah han rawn leh sawipui tur pawh nei loin lunglen nunhlui ngaih zual chang nite hian ka Diary hluite en chungin kan ziak leh thlarawk thin a, a ngaihnawm lam aiin a reality nunhlui sulhnu la hmuh tur te la awm zel a ni ta hi thangthar zel te tan nise, lung erawh a leng thin.
Mit dar langthla leh lairil ah,
An leng e lungrualpui te kha.
Chatuan tlangchhip Lalpa hmaah,
Kan la sawiho ngei ang nunhlui.