3R Centre hlutna …
India ramin faina lama beihpui a thlak tum hnihna – Swachh Bharat Mission (Urban) 2.0 hnuaia bawlhhlawh buaipuina chikhat kalpui mek, ‘R’ pathum tia sawi thin, Reduce, Reuse, Recycle chu Mizorama a kaihhnawih department UD&PA hnuaiah tun hnai August ni 14 atang khan kalpui ve tan a ni a. He 3R Centre hi UD&PA building, Thakthing tlangah dah niin, thla khat em pawh a la tlin hmain mipuiin an hlutin an chhawr tangkai nghal hle a, hei hi thil lawmawm tak a ni.
He 3R Centre hlutna, tangkaina leh thatna hi tam tak sawi tur a awm ang a, tuna hun rei lo te chauh hawn a nih chhung mai pawha mipuiin an chhawr tangkai nghal dan han hmuh hian, bungraw hlui khawn khawm chungchangah pawh, SHG mai piah lamah, YMA leh MHIP etc. te nen tangruala chak zawka hmalak theih tur niin a lang.
Khawpuiah hi chuan mi khawsa thei tak tak an lo tam tawh a, chu’ng miten bawlhhlawh an tih chin hi, mi harsa zawk tan chuan la chhawrnahawm tak a ni thei thin. Midang han pek dawna inthlahrunawm deuh si te pawh, tuna 3R Centre-ah hi chuan inthlahrung lovin a pek zung zung theih ta a. Bawlhhlawh ti tamtu chang mai tur kha midang tana tangkai ni bawk siah a chang hlauh dawn tihna a ni.
Hetih lai hian, 3R chungchangah hian thil a nih dan hrethiam lo tak tak mipui zingah a awm theih tih erawh a chiang hle. ‘Bungraw hlui bawlhhlawh chang mai thei tur’ han tih hian, thenkhat chuan bungraw hlui ni lovin bungraw chhia, entir nan bucket keh sawm tawh te, pawnchhe hnangkhai tak tak, chhuat nawhna atan pawha hman tlak loh tur ang chite vawmkhawm nana hmang mai duh an awm thin a, chung mite chuan bawlhhlawh paihna hmun (dumping ground) ang maiah an ngai tihna a ni. Hemi chungchang hi inhrilhfiah deuh chu a ngaihna chin a awm awm e.
Nikum khan Swachh Bharat Mission leh DAY-NULM tangkawp buatsaihin sikul bungraw inthleng runpui (Swap & Save) kha district hrang hrangah kalpui a lo ni tawh a. Swap & Save kha sikul bungrua, a hmangtu tana tangkai tawh lo, tangkaipui thei tur hnena hlanchhawn nana buatsaih a ni a. Bungraw dah luttute pawhin an mamawh zawng an lak theih bawk avangin a dahtute leh dawngtute tan a tangkaiin a hlawk hle a nih kha.
3R Centre hi mahnia inenkawl thei tura ruahman a nih avangin Fund eng mah siam a ni lo va, Recycling hi changtlung zawka an kalpui theih hunah chuan suma chantir theih tur chite pawh a la awm zel tura beisei a ni a, chumi hmang chuan changtlung zawka a kal chhoh zel theih te pawh a beiseiawm hle a ni.