4th round lut Sabalenka leh Osaka

4th round lut Sabalenka leh Osaka
French Open third round paltlang zingah Aryna Sabalenka leh Naomi Osaka telin, Inrinni zanah World No. 1 Sabalenka hian Australian nula Daria Kasatkina lakah 6-0, 7-5 hnehna changin upset lian a pumpelh hram!
A hma lawkin mipa singles lamah a zawnin ni hnih chhung chu tournament kal laiah rinkai pahnih an lo tla thum tawk tawh a; chu’ng mite chu men’s top seed Jannik Sinner leh 24-time Grand Slam champion Novak Djokovic-te niin, champ tura rinkai ni chungin Paris chawlhkar hnihna chuangkai pha lo zawngin an ral thum ve ve a ni!
Belarusian four-times Grand Slam champion Sabalenka pawh hi chak zawk tura ngaih a nih ang ngeiin set khatnaah harsatna a tawk eih lo a, set hnihna erawh a dan a dang ta daih a, khelmual a luh hma darkar 48 chhunga tla hraw pahnih hnung a zui ve thei mai dawn em tih ngaihtuahna a put theih rum rum hnuah fourth round lama Japanese Osaka hmachhawn thei turin a tlang hram a ni.
Court Suzanne Lenglen-a Sabalenka hneh zo ta lo Kasatkina kha Russian ni mah se nikum khan Russia ram mi a nihna bansanin Australian-ah a inziaklut fel a, an inkhelh lai pawhin amah tantute chu ‘Aussie, Aussie, Aussie’ tiin an au laih laih a nih kha!
Third round inkhel dangah seeded 16th Naomi Osaka hnehna kalkawng a harsa zual a, set thum chhung inbeihna hautak zetah American tleirawl Iva Jovic chu 7-6(5), 6-7(3), 6-4-in a paltlang hram a, a career-a a vawi khatna atan French Open fourth round lutin, World No 1 Sabalenka lakah fiahna hautak lehzual tura beisei a hmachhawn zui leh dawn a ni.
Kum 18 mi lek Jovic khan he tournament-ah hriat la hlawh lo mah se Court Suzanne Lenglen-ah world number one hlui a chhaihbuai hneh hle a ni.
Inrinni vek khan French mipuiin lawmna tur an nei a, Diane Parry chuan rinkai zawk Amanda Anisimova laka hnehna changin French Open fourth round a lut nawlh!
Roland Garros women’s draw lama tualchhung player dam awmchhun ni tawh Parry hian 6-3, 4-6, 7-6(3)-a American sixth seed Anisimova hnehin a career-a a vawi khatna atan Grand Slam fourth round a lut a, Maja Chwalinska a hmachhawn zui leh ang.
Kum 23-a upa Parry hi world ranking-ah 92-na niin, Court Philippe Chatrier inkhelah khan home fans puihna leh thlawpna hmu tha engang mah se tum hnih ngawt major finalist lo ni tawh, nikum maia U.S. Open leh Wimbledon final boruak tem tawh, kum 2019 daih tawha Roland Garros semi-finalist lo ni tawh lakah khan chak zawk tura beisei a ni lo a, mahse, tournament kal laia upset lian thlentirtu pakhat a ni zui ta tlat a ni.