7 Wonders of the World tlawh kim rang record siam

Egyptian Magdy Eissa, kum 45, chuan public transport chauh hmangin ni 6 leh darkar 11 leh minute 52 chhungin khawvel thil mak leh ropui pasarih (Seven Wonders of the World) a tlawh kim vek hman a, Guinness World Record a siam. A hmaa heng thilmak pasarih tlawh kim vek rang thei ber record siamtu chu sap pachal Jamie McDonald niin, Jamie aiin Eissa hian darkar li leh a chanve velin hun a hmang tlem zawk a ni.
Eissa hian Great Wall of China atanga bul tanin, Taj Mahal (India), Petra (Jordan), Colosseum (Rome), Christ the Redeemer (Brazil), Machu Picchu (Peru) leh Chichen Itzia (Mexico) te a indawtin a tlawh chhuak vek a, heng khawvel thil ropui pasarih te hi ram hrang hrang bakah khawmualpui hrang hranga awm niin, Eissa hian ni 6 leh darkar 11 le minute 52 chhungin a tlawh kim vek hman a ni.
Record siam turin hian Eissa hi a inpuahchah nasa hle a, thlawhtheihna kal dan, rel, bus leh subway ta chu a tum ram a thlen zung zung theih nana a inman dawn dan awlsam tur te a ruahman sa vek a, public transport chauh hman theih a nih si avangin flight delay leh cancel palh te a hlauhawm hle a, tum khat khat chu Peru atanga Mexico a thlawk tur a tlai deuh a, mahse, world record siam tuma bei lai a nih thu a sawi hnuah check-in counter an hawn sak leh ta hram a ni.