Lunglei Jail leh Fire Station tlawh

Lunglei Jail leh Fire Station tlawh
Home minister Lalchamliana chuan Inrinni zing khan District Jail Lunglei a tlawh a, jail ward hrang hrang leh Superintendent office tlawhin an dinhmun a enfiah.
District Jail-ah hian staff dah belh a tul thu leh Superintendent office vertical extension a tul thu an lo thlen chu a theih anga bawhzui a tum thu a sawi a. Jail hungna thawm that ngai laite enfiahin, hma lak nghal a nih tur thu a sawi. Jail tang tlanchhuahna laite enfiahin, tangten harsatna an tawh leh tawh loh a zawt a; jail tangte hian ei leh in, tui chungchangah harsatnna an tawh loh thu an lo hrilh. Jail dinhmun Superitendent leh thawktu ten an lo thlen hrang hrang ngaihthlak sakin a theih anga lo bawhzui a tum thu a sawi.
Home minister hian kar kalta Zirtawpni khan Lunglei Fire Station a tlawh a. 2021 April 24-26 2021 chhunga Lunglei chhehvel ramkang thelhmih kawnga theitawp an chhuah avanga India ram pum huapa hnathawh that chawimawina ‘Subash Chandra Bose Aapda Prabandhan Puraskar 2023’ an dawn chu a lawmpuiin a chhuang tih a sawi a, Mizoram sawrkar aiawhin lawmthu a sawi. 15th Finance Commission-in ram puma Fire Station tih changtlunna tura sum, vaibelchhe 1500 ruahman atangin Lunglei district tan cheng vaibelchhe 5 a beisei tih sawiin, hemi hmang hian Lunglei Fire Station leh quarters sak a nih tur thu a sawi.