Women & Child Helpline call tu 53% mahnia bepawp

Women & Child Helpline
call tu 53% mahnia bepawp
Hleilenna thil avanga tanpuitu aua Women & Child helpline bepawptu zaa 53.4 chu a tuartu ngeiin an biakpawh a ni a, zaa 67.4 chu Aizawla cheng an ni.
Women & Child Development department chhinchhiah danin, helpline-in phone call an dawn zawng zawng zinga zaa 53.4 chu harsatna tawktu ngeiin an biak a ni a, zaa 46.6 chu midangin an biaksak a ni. Heng phone call an dawn zinga zaa 67.4 chu Aizawl khawpui chhung atangin a ni a, Aizawl pawn atangin zaa 32.6 phone call an dawng.
Case an ziahluh zaa 48 chu hmeichhia, hleilenna tuar, tanpui ngai an ni a. Chu’ng hmeichhe puih ngai an lo puihte zinga zaa 44 chu pasal pawmlai nei niin, harsatna tuar zingah kum 21-40 inkar an tam ber a, zaa 60 a ni. Hleilenna tuartu zinga zaa 31 chuan kut an tuar a, tawngka dengkhawng taka inhauhna tawk zaa 38 an awm a; zu ruih kaihhnawiha hleilenna tawk zaa 21 an awm bawk. An pasalte atanga hleilenna tawk an tam ber a, zaa 68 an ni.
One Stop Centre-a harsatna tawk inhumhim tura tlanlut zinga zaa 58.5 chu hleilenna, kut tuar chhanhim ngaite an ni.
W&CD department bultum hian hmeichhe chunga hleilenna lantirna film “Pine Hill” siam a ni a, Thawhlehni zan khan W&CD minister Er Lalrinawma’n a tlangzarh. Hmeichhiaten himna leh thlamuanna an mamawh thin a, naupangte pawhin an thil dawn theih hlu ber chu nu hmangaihna a ni a, pasalten chu chu nupuite an enkawlna kawnga an hriatreng a pawimawh hle, tiin a sawi.
Hmeichhiate chunga hleilenna awm changin thuhretu dika tang ngamlo an awm thin avangin thil tisualtu an zalen leh fo thin tih minister hian sawiin, “Chutiang a nih lohna’n thuhretu huaisen taka tan ngam zel a pawimawh,” a ti. Hmeichhiate himna, thlamuanna leh chawikan kawngah theihtawp chhuah chu kan tih makmawh a ni tih a sawi bawk.