Rinnunga kutah Asian silver medal

Rinnunga kutah Asian silver medal
South Korea khawpui pakhat Jinju-a Asian Weightlifting Champion-ships 2023-ah Pathianni khan Ainawn veng tlang-val Jeremy Lalrinnunga chuan snatch bikah kg 141 chawiin silver medal a hlawhchhuak.
Indian weightlifter Jeremy hian chhuata chawi tur an chhawp (barbell) chawikan hnua dara nghat khaw muang loa lu chunga chawi tlang nghal (snatch) bikah silver medal awrh bawk mah se harsatna a tawk zui ta tlat a, chawi hnua kokia nghah det hnua char (clean and Jerk)-ah 1st attempt (165 kg), 2nd attempt (165 kg) leh 3rd attempt (168 kg) lamah a hlawhchham zui ta tlat a, overall total nei zo ta loin, lifter 12 zingah inelna hmachhawn zo thei lo (DNF) awmchhun a ni zui ta nghe nghe.
Kumin September ni 23 atanga October ni 8 chhung hian Hangzhou, China-ah Asian Games 2023 nghah a ni dawn a, hemi atan Rinnunga hi inbuatsaih chho zel tura beisei a ni.
Asian Weightlifting Championship hi 2022 Commonwealth Games hnu lama Jeremy-a’n tournament a hmachhawn leh vawikhatna niin, kum 20 miin non-Olympic 67kg weight class-a a chawi zat (141kg) hi snacth bika mimala a chawi rih theih ber record (personal best) ding lai niin, Korea ramah hian a mimal record dinglai a tluk leh chiah a ni.
Tarlan tawh angin, Jeremy hian clean and jerk lama a chawi (attempt) vawi-khatna leh vawihnihna-ah kg 165-a rit chu a chawikang zo lo a, a vawithumnaah ‘barbell’ rih zawng chu kg 168 tling turin an tihrih belh a, chu chu clean and jerk bika a ‘personal best’ aia kg hnih zeta rit a ni a, mahse, reigning Youth Olympic champion hi a vawi-thumnaah pawh a hlawh-chham leh ta tho a ni.
Mizo lifter hi malpui hliam thawhsan hlim niin, nikum World Championship-ah pawh a inlan theih loh phah a, tournament-a a kirleh hnuah duhthusamin in-lan thei rih lo mah se snatch bikah silver medal a hlawhchhuak zui leh ta tho a ni.
A telna huangah hian 320kg (147kg+173kg) chawi tling Chinese He Yueji chuan gold awrhin, tualchhung tlangval rinkai Lee Sangyeon 314kg (139kg+175kg) kutah silver a lut a, bronze medal dawngtu chu Uzbek lifter Ergashev Adkhamjon 312kg (138kg+174kg) a ni thung.
Asian Weightlifting Championships 2023 hi Paris 2024 Olympic Games-a tel tur zawnna (series of qualifying event)-ah a pahnihna a ni.