Madrid Open hnehtu Alcaraz

Madrid Open hnehtu Alcaraz
World number two Carlos Alcaraz chuan set thum khelha Germany player Jan-Lennard Struff hnehin Pathianni zanah Madrid Open title a humhim.
Kum 20 mi leka upa Spaniard hian 6-4 3-6 6-3-in final-a a tumpui German world number 65 a hneh a, kumin ATP Tour bika a trophy lak palina leh a career pumpuia 10-na a ni.
Ti hian, Alcaraz hi kum 2014 champion Rafael Nadal hnu lama mipa zinga Madrid khawpuia title humhim leh thei hmasaber a ni.
US Open champion Alcaraz hian tunkar Rome khaw tournament khel chungin ATP ranking-a number one luahtu Novak Djokovic hmakhalh theihna hun remchang a nei thei tawh dawn.
Madrid khawpuia a chak hma hian April thla mai khan Barcelona Open-ah champion tawhin, May ni 28 atanga khelh tan tur French Open atan pawh champion tura rinkai a ni chho zual zel.
Madrid Open wo-men’s champion Aryna Sabalenka ang bawkin karliamta Zirtawpni kha Alcaraz-a birthday niin, kumin bikah vawihnih chiah a la tlawm.
Pathianni hnehna kha ATP Masters 1000 trophy pali a lak tlinna ni bawkin, nikum Septem-ber thla khan US Open title a sualchhuah hnuah world number one ni thei naupang ber nihna a hauh a, kumin January thlaa Djokovic a rawn lan leh tak hma thleng khan chawlhkar 20 chhung number one thutthleng a luah hman.
Tarlan tawh angin, tunkar tawp lam Rome khaw tournament-ah hian a chhuah hrim hrim chuan Spaniard hian Djokovic hmakhalhin world number one dinhmun a luahkir leh thei dawn a, tun din-hmunah point humhim tur a nei lo a, Serbian zawk hian Italy lei-lungah a No 1 nihna leh point 1000 a hum a ngai thung dawn a ni.