Gauff leh Jabeur chak phawt

Gauff leh Jabeur chak phawt
American sixth seed Coco Gauff leh Tunisian seventh seed Ons Jabeur-te chuan tunhnaia an chetfuh lohna thawhsanin French Open second round an lut.
Nikum Roland Garros grand slam tournament-a final thleng Gauff hian set hmasa ber hloh zet chungin French Open junior champion hlui Rebeka Masarova lakah 3-6 6-1 6-2 hnehna a chang a; chawn tha na avanga Paris clay court grand slam atana inbuatsaihna kalpui tha thei lo Jabeur pawhin 6-4 6-1-in first round-a a tumpui Italy player Lucia Bronzetti a hneh ve bawk.
Arab leh African hmeichhe tennis player zinga thleng sang ber Jabeur hian nikum khan Paris-ah first round a paltlang zo lo a, kumin Roland Garros-ah erawh bul a tan fuh a, 65th-ranked Bronzetti lakah harsatna lian a tawk lo.
April ni 22-a khan Iga Swiatek nen Stuttgart-a an inkhelh laiin Wimbledon leh US Open finalist Jabeur hian hliam avangin match a khel zo thei lo a, khami hnu, unseeded Italian Bronzetti a hmachhawn hma si khan match khat chiah la khelin, Paris-ah inbuatsaihna mumal nei lo chungin a inlan a, round hmasaber a paltlang phawt.
Kum 28 mi Jabeur hian second round lamah world number 122 Oceane Dodin leh wildcard Selena Janicijevic inkhela chak zawk zawk a hmachhawn leh ang.
World number seven Ons Jabeur hian Charleston-a title a lak hma khan a khup hliam tenau zai a tawk a, a chawn lamah harsatna tawk zui lehin, French Open inbuatsaihna Madrid Open lamah pawh a chhuak thei lo a, mahse, Paris-ah tha takin a inlan leh thei.
First round paltlang ve bawk American tleirawl kum 19 mi Gauff hian kumin Euro-pean clay-ah match chak zawn a la nei lo a, Thawhlehniah pawh set hmasaber a hloh leh zet a, mahse, set hnihna atangin Spaniard world number 71 Masarova lakah harsatna lian tawk loin second round a lut.
Nizana world number one Iga Swiatek-i’n a title kawl lai humhim tura a chetchhuah hmasakbera Spanish world number 70 Cristina Bucsa a hneh leh hneh loh bakah Wimbledon champion Elena Rybakina result tarlan hman a ni lo.