Zo hnahthlakte leh Meitei kara buaina a chhuahna hmun Manipur-a zin India ram home minister Amit Shah hnenah Zo hnahthlakte’n inrelbawlna hran an duh thu an lo hrilh.
Thawhlehni khan Amit Shah hi Churachandpur-ah a kal a, Churachandpur district-a Zo hnahthlak chi peng hrang hrangte nen an inkawm a ni.
Churachandpur khawpuia Assam Rifles hmuna Amit Shah hmuhnaah hian Zo hnahthlak chi peng hrang hrangte’n an aiawh turin mi an tir a, chi bil tlawmngai pawl hruaitu an ni tlangpui.
Churachandpur atanga thu dawn danin, Zo hnahthlakte hian Meitei nena awmho thei an nih tawh loh thu an sawi a, Meitei-in an tih dan chu lungawithlak loh an tih thu te sawiin, anni nena rorelna pakhat hnuaia awm zel chu him lo an tih thu te an sawi a, chuvangin inrelbawlna hran an duh a, chu chu remti turin India sorkar an ngen tih an sawi.
Inrelbawlna hran chungchangah hian Amit Shah hian awka a chhuah lo tih thu dawn a ni a, Zo hnahthlakte hi thil dang a kawhhmuh a ni.
Amit Shah hian tun tum buaina chhui turin judicial enquiry din a nih tur thu leh thil dik lo titu chu hrem an nih tur thu te a sawi a, India constitution article 355 hmangin tribal-te venhim an ni ang tih te a tiam bawk.
Constitution article 355 hi intihduhdahna leh innghaisakna laka mipuite veng tura sorkar laipui thuneihna a ni a, chu dan hmang chuan Manipur-a tribal mipuite venhim an ni ang a, venghimtu sipai thawnluh an ni ang tih te a tiam a ni.
Amit Shah hian chawhma lamah Imphal-ah Meitei lam a kawm a, chawhnu lamah helicopter-in Churachandpur-ah a kal a, Zo hnahthlakte a kawm ve leh. Nilaini hian Moreh-ah a kal ang a, a tukah Kangpokpi-ah kalin Zo hnahthlakte a kawm leh ang. Zo hnahthlakte hi thu khat vuain an kal a, Moreh leh Kangpokpi-ah pawh hian Churachandpur-a an hruaitute sawi ang tho an lo sawi dawn tih thu dawn a ni.
Inrelbawlna hran an duh thu Amit Shah hrilh
Get real time updates directly on you device, subscribe now.
Prev Post
Next Post