Inremna a awm theih nana inbiakna rei fe neih a nih hnuah House of Representatives chuan US in sum tam zawk a puk a remti ta, ni lo se chuan khawvela economy lian ber chuan leiba pawh pe thei tawh lo mai tur a ni.
US Senate chuan tunkar chhung hian remtihna pe zui dawnin chu mi hnuah President Joe Biden chuan dan a nih theih nan hming a ziah hnan dawn a ni. Inremna awm lo se chuan 5 June atang chuan US sorkar chuan sum hman tur nei tawh lo mai tura ngaih a ni a.
Nilaini khan vote lak a nihnaah a tira sel nasa bertu Democrats 165 te chuan Republicans 149 te thlawpin House chuan simple majority in a paltlang pui ta a ni. Senate erawh Democarts te thunun a nih avangin tlang nghal mai tura ngaih a ni thung.
-- Advertisement --
Eng nge debt ceiling?
Debt ceiling hi debt limit tia sawi tho niin a awmzia ber chu sorkarin a bill neih te a pek theih nana sum a puk theih chin bithliahna a ni.
Federal employees, military, Social security leh medicare atana a sum pek turte bakah national debt interest leh tax refunds-te pawh a huam tel vek a.
US Congress chuan leiba neih theih chin hi sum tam zawk a puk theih nan an tisang fo thin a ni.
Tuna US-in leiba a neih theih chin hi $31.4 trillion a ni a. He tiamchin hi January thla khan an pel tawh a, mahse, treasury Department chuan ‘extraordinary measures’ tia sawi kalpuiin sorkar chu ruahmanna a siam fel hmain sum tam zawk pein a pui lailawk thung a ni.
A tlangpuiah chuan Congress chuan leiba neih theih chin hi an tisang mai a, mahse, tun hnaiah party pahnih te chu ngaihdan inang lo nasa tak an neih avangin an inkarna a hla tial tial a, inremna an nei mai thei lo a ni.
A hma pawhin US Treasury Secretary Janet yellen chuan US chuan sum a puk belh lo a nih chuan 5 June atangin hnathawk hlawh ang te sum pekchhuah tur a nei tawh dawn lo a lo ti lawk tawh a ni.
Tuna inremna an siam takah chuan Congress chuan leiba neih theih chin kum 2025 thleng an tisang duh chuang lovin mahse kum 2025 thlengin mamawh chin puk theihna remtihna an pe a. Kum 2025 thleng chuan US-in bill pe thei dawnin harsatna a nei dawn lo va, hetia an tihna chhan chu presidential election nghawng lo se an tih vang a ni.
Sum hman theih bituk siam, defence erawh huam lo
Republicans te chuan a pumpui thuah kum 10 chhung chu sum hman theih tihsan an duh lo va, mahse, hei hian defence lam erawh huam lovin budget dangte erawh tihtlem an duh a ni.
Inremna ang chuan non-defence lama sum sen chu khuahkhirh niin kum 2025-ah 1% in a pung chauh ang a, tuna budget khauh taka kalpuiin a nghawng neih dan tur hriat mai theih a la ni lo.
Defence lama sum sen erawh $ 886 billion-ah chho dawrh thung dawnin kumin a punna chu 3% a ni dawn a. Mahse kum 2025 hnu lamah chuan budget cap a awm tawh lo thung ang.
White House chuan inremna an siam hmangin sorkarin sum a sen theih tur chu $ 1 trillion velin tihhniam a ni ang an ti a. Chutih rual chuan military veteran te medical care fund erawh tihpun a ni thung ang.
US-a public health emergency official a tawp tawh hnuah Republicans te chuan relief fund atana sum dah te pek kir ni se an ti a. Congressional Budget Office chuan heta sum awm peklet tur hi $ 30 billion vel lai ni turah an ngai.
Republicans tena an ngiat ber pakhat chu welfare benefits sem darh danah khauh zawka thil kalpui a ni a, hei hi Democrats te chuan an dodal bur a ni ve thung a.
Democrats tena an kalpui mek Medicaid (health coverage for poor Americans), the Supplemental Nutrition Assistance Program (SNAP) leh Temporary Assistance for Needy Families (TANF) a sum sen chu tihtlem an ngiat a ni.
Inremna siamah Medicaid bik chu khawih danglam a ni lo va, SNAP erawh a hmaa kum 50 chin tih chu kum 54 a tihsan a ni thung a.
US-in sum a puk theih tihsan chungchanga inhnialna leh ngaihdan inang lo nasa tak awm hi political party pahnihte ideology inan loh em vang a ni.
Republicans te chuan sorkar sum sen danah ngaihthatlohna an nei a, anni ngaihdanah chuan national debt sang lutuk chu sorkar tha lo lantirna a ni a. Republicans te chuan leiba neih nasat lutuk chu hun rei lo te hnuah economic mai ni lo vantlang nun pawh tichhe turah an ngai a ni.
Democrats te erawh chuan sorkar hmalakna chu tihmakmawhah ngaiin Americans te nun tihnawmna turah an ngai ve thung a, tun hmaa thil kalpui dan dik lote siamthatna tur an ti ve thung.
Party pahnih tena inremna siamah hian students loan relief te, Tax tihsan te, Clean energy chungchangte erawh khawih danglamin a awm lo thung.