Mega Job Fair vangin mi 200 velin eizawnna nei thar – LESDE minister

Mega Job Fair vangin mi 200 velin
eizawnna nei thar – LESDE minister
Labour Employment Skill Development & Entrepreneurship (LESDE) department-in Mizo thalaite tana hna zawnsakna runpui Mega Job Fair a buatsaih kaltlangin mi 200 velin eizawnna an nei tawh tih LESDE minister Lalchhandama Ralte chuan a sawi.
Zirtawpnia MNF office inkhawmah MNF adviser ni bawk Lalchhandama Ralte chuan kumin May thlaa Aizawla Mega Job Fair-ah thalai mibikten eizawnna an neih theihna’n company hrang hrang atangin interview an rawn nei a. Chutah chuan mi 150-in eizawnna appoinment an hmu a, chu’ng zingah chuan British Army-a tang turin mi pahnih an tlin bakah Singapore-a ei zawng turin mi 71 an tling a. Job Fair vang hian thalai mi 200 velin eizawnna an neih phah tih a sawi a. Lunglei leh Siaha ah neih leh an tum tih a sawi a ni.
MNF policy & programme-a education-a an hmalakna tura inziakah Mizorama zirna leh Mizo nationalism hnuhhnaih a, thangtharten thiamna, hnam thinlung an neih theihna’n moral education an neih zelna atan theih ang tawkin hma an la tih a sawi a. An lo thanlena nationalism thinlung an put theihna atan tan an la tih a sawi.
Lunglei Municipal inthlan leh Zemabawk Local Council inthlanah MNF chu an vaw sil viau na a, kha inthlan kha hmachhawn lo ta se, tha nia an hriat ang khan lo kal ta tak tak se, kumin kumtawp inthlanah chuan an nasa lo maithei tih MNF adviser hian a sawi a. Darthlalangah chiang takin an inhmu a, party organisation tha an nihna a lo langchhuak leh a, chiang takin kumtawp inthlan pawh a hmuh lawk tir tih a sawi a ni.
Tunhnaiah Congress party an inban phengphung a, an PAC an thiat a, block te an bang niin a sawi bawk a. ZPM lah nimin lawka an PAC thukhawm luhaina ber chu, an phur lutukin bial viltu mi 35 an puang chiah chu an hniam ta ruai ruai tih sawiin, “Bial tin an invilthuah sup sup ta mai a, a tawpah chuan mipui hian MNF nge nge an sawrkar leh dawn tih chu office leh tualzal titi a ni leh ta,” Lalchhamdama Ralte hian a ti.