Siaha-a bank hnathawh thlirlet

District Consultative Committee /District Level Review Commitee /District Level Security Committee (DCC/ DLRC/ DLSC) Siaha chu Thawhlehni khan district bawrhsap Lalhmunsanga Hmante kaihhruaiin Siaha-ah an thukhawm a. 2022 quarter hnuhnung ber chhunga an district-a bank-te hnathawh leh hmachhawp an thlir ho.
Siaha district-a pawisa thir (coins) lengvel tlem lutuk leh chumi tihrehna atana hmalak dan tur sawi a ni a. Pawisa thir lengvel tlem lutuk hian an district thil man a tih to bakah thuk takin district economy thlengin a nghawng a nei tih te sawi a ni. Pawisa thir lengvel ti tam tur leh hman uar leh tura hmalakna chikhat atan Coin Mela buatsaih tum a ni.
PMJJBY leh PMSBY hamthatna Siaha district mipuiin an chan vek theihna’n mipui hnena hetiang lam chungchang zirtirna leh thiltul dangte buaipui turin district chhunga khaw awmte chu Siaha district-a bank 7-ten inchansemin an tuamchhuak vek dawn a ni.
Bawrhsap chuan sawrkar laipuiin bank kaltlangin mipui vantlang hamthatna tur project leh scheme tam tak a duan chu bank lamin an puanzar that a tul tih a sawi a. Financial literacy campaign nasa zawka kalpui a ngai a tih thu leh Rs.2000 note chu RBI-in a mipui hman zui tawh loh tura a hnuhlet mek avangin kumin September 30 thlengin bank-ah a dahluh/ thleng theih reng tih a sawi a ni.