BJP president J.P. Nadda chuan kum 2023-a electoral calender pawimawhna sawiin kumin hian Assembly inthlan state pakuaah neih a ni dawn a, kum 2024 ah General Election neih a ni dawn bawk a. Party organisation te chu heng inthlan tin BJP tena chakna an chan theih nana hma la turin a ti.
-- Advertisement --
BJP national executive meeting New Delhi a neih mekah thusawina a nei a. Union Minister hlui Ravi Shankar Prasad chuan Nadda-a presidential address chu closed door meeting-ah a nei tia sawiin Nadda chuan party leader te chu State pakua inthlan turah BJP ten chakna an chan vek theih nana hma la turin a ti tiin a sawi.
National executive meeting-ah hian BJP hruaitu ram chhung hmun hrang hrang atangin 350 dawn an pung khawm a. Prime Minister Narendra Modi atanga Union Minister te, Chief Minister leh State hrang hranga senior member te an pungkhawm a ni.
Tun hnaia inthlanna neihah Nadda home state Himachal Pradesh ah BJP te an chak lo va. Hei vang hian party chuan State-a opposition an nihna tinah sorkar ngei tura chet lak a ngai a, an sorkar tawhnaah te kulh rinawm chhe thei lova an awm reng a ngai tiin a sawi.
Kumin hian Tripura, Nagaland leh Meghalaya te an inthlang hmasa ang a, chumi hnuah Karnataka-in zuiin, Rajasthan, Madhya Pradesh, Chhattisgarh, Mizoram leh Telangana ten an zui leh dawn a ni.
Nadda chuan minute 45 dawn thusawina a neihah State leh Centre a BJP sorkarnaah Other Backward Classes, Scheduled Castes leh Scheduled Tribes aiawh te an dah vek thu sawiin hei bakah hian constitutional position Governor angah te pawh an dah thu a sawi bawk a.
“Party chuan OBC, SC leh ST te aiawh a dah vek a. Hei hian Sabka Saath, Sabka Vikas, leh Sabka Prayas kan kalpui zia a pholang a ni” tiin a sawi a. Modi kaihhruaina hnuaiah party chuan an voter base an tihzauh zel thu a sawi bawk a.
“India chu khawvela economy lian ber pangana a ni tawh a, mobile phone siam chhuak hnem ber pahnihna a ni tawh a, auto sector ah a lian ber pathumna ni tawhin ni tina highway sial pawh nikhatah 12 km atangin 37 km ah tihpun a ni tawh,” tiin a sawi bawk.
India chuan mirethei te dawmkan tumin welfare schemes te kalpuiin chung zingah chuan buhfai a thlawna sem te pawh a tel a ni, tiin a sawi bawk.
Gujarat chakna
Nadda chuan party te chu tun hnaia Gujarat Assembly a chana an chan leh chu chhinchhiahtlak a nih thu hrilh bawkin State unit dang te chu Gujarat tihdan laa zir turin a ti bawk a. Modi-an hah sawi lova pawl a tihchak zel chu a fak bawk a. Himachal Pradesh-ah Congress chak zawk mah se an chakna chu one per cent pawh tling lo a ni, a ti bawk.
Ram temple sak chu chak thei ang bera kalpui mek a nih thu sawi bawkin sorkar chuan India culture leh religious tradition hausa tak chu tihchak zual zel a tum thu sawiin, India chuan Covid vaccination campaign hlawhtling takin a kalpui a, khawvel fak a hlawh a ti bawk.
BJP party chaun social reformer Arya Samaj founder Dayananda Saraswati piancham kum 200-na chu pui taka lawm a tum tia sawiin Modi pawh Saraswati zuitu niin society hnuchhawnte tana thawk a ni a ti bawk.