Chite Venga sawrkarin Aizawl Convention Centre tur sak mek chu kumin August thla chhunga zawh hman an tum tih a satute chuan an sawi.
-- Advertisement --
Sawrkar laipui Ministry of Tourism-in a sakna tur sum zaah za a tum Aizawl Convention Centre hi Wapcos Company-in a sa mek hi Tourism minister Robert Romawia Royte chuan Thawhlehni khan a tlawh a. Contractor-ten mittlung taka hun reilote kara hna chak taka an thawk chu lawmawm a tih thu a sawi.
Aizawl East-II bialtu Robert Romawia Royte hian Aizawl Smart City Ltd hnuaia Chite Football Ground-a artificial turf phah tura hna thawh mek te, Chite lei leh Bazar Haat sak mek te, UD&PA hnuaia cheng nuai 75 senga Armed Veng chung leh Armed Veng chuanhnuai kawr chunga inkalpawhna kawng siam hna thawh mek leh, Sports department hnuaia Mizoram State Sports Council enkawla Armed Veng South Hall extension hna thawh mek, Armed Venga 1st MAP Ground astroturf phah mekte pawh tlawhin hnathawh dan a enfiah a, hengte hi mipui nghahhlelh a nih avangin tha tak leh chak taka thawk turin thawktute a chah.
Minister hian Dawrpui Multipurpose Centre bula Basketball Court leh Trauma Centre sak mekte bakah gym a tlawh bawk.