Guinness World Records chuan nimin khan khawvela upa ber Sister Andre, a laiah hming Lucile Randon, kum 118, thih thu an puang. Sister Andre hi February ni 11, 1904 a piang a ni a, Guinness World Records chuan Kane Tanaka thih hnuah nikum April thla khan Sister Andre hi khawvela mihring damlai zinga upa berah an puang ta a ni.
-- Advertisement --
Lucile hian 1944 atangin Sister Andre tih hming hi a pu tan a, ani hi French mai bakah Europe kawmualpuia cheng zinga chhin chhiah theih china damrei ber dawttu a la ni.
Sister Andre hi kum lamah pawh a la naupan deuh lai chuan zirtirtu hna te pawh a lo thawk tawh thin a, Khawvel Indopui Pahnihna lai khan naupang a enkawl thin. Indopui a zawh hnuah kum 28 chhung chu fahrah naupang leh kum lama upa tawh te enkawlin Vichy, Auvergne-Rhone-Alpes a damdawi inah a thawk a, chumi hnuah sakhaw rawngbawlna lamah kalin Catholic nun a ni ta a ni.
Kum 2019 khan a chenna Toulon, Provence-Alpes-Cote d’Azur chuan honorary citizen-ah an puang a, Pope Francis hnen a\angin lehkhathawn a dawng nghe nghe a ni.
Sister Andre hian record dang pawh a siam a, COVID-19 hripui khan a man ve ngei a, vanneihthlak takin a dam chhuak a, COVID-19 survivor upa ber record a ni. Khawvel huap hripui leng dang Spanish Flu, 1918 ami pawh kha a lo tawng hman tawh a ni.
Sister Andre hi a COVID tih January ni 16, 2021 khan an hrechhuak a, kar thum hnuah a \ha takin a dam chhuak a, symptom emaw side effect emaw pawh a nei hran lo niin an sawi nghe nghe a ni.
Tunah hian chhinchhiah theih china khawvela damrei ber chu French Jeanne Louise Calmet niin, February ni 21, 1875 a piang a ni a, kum 122 leh ni 164 mi niin a thi a, Sister Andre hi chhinchhiah theih china damrei ber dawttu a ni.